ផ្កាយរណបរបស់អង្គការណាសា ដែលមានទំហំប៉ុនម៉ាស៊ីនលាងចាន ត្រូវបានបាញ់បង្ហោះទៅកាន់ទីអវកាសពីរដ្ឋ Florida របស់សហរដ្ឋអាមេរិក កាលពីថ្ងៃពុធ (២៦ កុម្ភៈ) ក្នុងបេសកកម្មស្វែងរក និងកំណត់ទីតាំងណាដែលមានទឹកនៅលើផ្ទៃព្រះចន្ទ នៅកន្លែងដូចជារណ្ដៅ ដែលមានស្រមោលជាអចិន្ត្រៃយ៍នៅប៉ូលព្រះចន្ទ ខណៈប្រភពទឹកជាធនធានដ៏មានតម្លៃ។

យានជម្រុញ Falcon 9 របស់ក្រុមហ៊ុន SpaceX បានបាញ់ចេញពីមជ្ឈមណ្ឌលអវកាស Kennedy ក្នុងទីក្រុង Cape Canaveral ដោយដឹកយានអវកាស Lunar Trailblazer របស់ណាសា ដែលត្រូវបានសាងសង់នៅអង្គភាពអវកាស Lockheed Martin។

ផ្ទៃព្រះចន្ទ តែងតែត្រូវបានគេគិតថាជាកន្លែងស្ងួត ប៉ុន្តែការវាស់វែងពីមុនបានរកឃើញវត្តមាននៃទឹកមួយចំនួន សូម្បីតែនៅកន្លែងដែលមានពន្លឺថ្ងៃក្តៅខ្លាំងក៏ដោយ។ នៅកន្លែងត្រជាក់ និងមានស្រមោលបាំងជាអចិន្ត្រៃយ៍នៅប៉ូលព្រះចន្ទ ត្រូវបានគេសន្មត់ជាយូរយារណាស់មកហើយថា អាចមានបរិមាណទឹកកកទឹកច្រើន។

យាន Lunar Trailblazer ដែលមានទម្ងន់ប្រហែល ២០០គីឡូក្រាម និងទទឹងប្រហែល ៣,៥ម៉ែត្រនៅពេលបន្ទះសូឡាត្រូវបានបំពាក់ពេញលេញនោះ កំពុងត្រូវបានបញ្ជូនទៅស្វែងរក និងគូសផែនទីនៃប្រភពទឹកនេះនៅលើផ្ទៃព្រះចន្ទ៕