របាយការណ៍សម្ងាត់ចំនួនពីរដោយទីភ្នាក់ងារឃ្លាំមើលនុយក្លេអ៊ែរ IAEA របស់អង្គការសហប្រជាជាតិ បាននិយាយកាលពីថ្ងៃពុធ (២៦ កុម្ភៈ) ថា ឃ្លាំងស្តុកសារធាតុអ៊ុយរ៉ានីញ៉ូមដែលជិតដល់កម្រិតអាវុធរបស់អ៊ីរ៉ង់ បានហក់ឡើង ចាប់តាំងពីខ្លួនបានប្រកាសពីការបង្កើនល្បឿនយ៉ាងខ្លាំងក្នុងការពង្រឹងសារធាតុនេះនៅក្នុងខែធ្នូមក ហើយពុំមានវឌ្ឍនភាពក្នុងការដោះស្រាយបញ្ហាដ៏គ្រោះថ្នាក់នេះនៅឡើយទេ។

ស្តុកសារធាតុអ៊ុយរ៉ានីញ៉ូម ដែលចម្រាញ់ភាពសុទ្ធបានរហូតដល់ ៦០% ជិតដល់តួលេខ ៩០% នៃកម្រិតគ្រាប់បែក គឺជាក្តីកង្វល់ដ៏យូរលង់ណាស់មកហើយសម្រាប់មហាអំណាចលោកខាងលិច ដែលនិយាយថា មិនមានហេតុផលសមរម្យណាមួយសម្រាប់ការចម្រាញ់សារធាតុអ៊ុយរ៉ានីញ៉ូមដល់កម្រិតខ្ពស់បែបនេះទេ។ អ៊ីរ៉ង់និយាយថា ខ្លួនស្វះស្វែងរកតែថាមពលនុយក្លេអ៊ែរដោយសន្តិភាពប៉ុណ្ណោះ។

ខណៈរដ្ឋបាលរបស់លោកប្រធានាធិបតីអាមេរិក Donald Trump និយាយថា ខ្លួនមានគម្រោងដាក់សម្ពាធលើអ៊ីរ៉ង់ ជុំវិញកម្មវិធីនុយក្លេអ៊ែរ ទីភ្នាក់ងារថាមពលអាតូមិកអន្តរជាតិ IAEA លើកឡើងថា ពេលវេលាជិតអស់ហើយសម្រាប់កិច្ចប្រឹងប្រែងការទូតដើម្បីដាក់កំហិតថ្មីលើសកម្មភាពអ៊ីរ៉ង់។

ស្តុកនៃសារធាតុអ៊ុយរ៉ានីញ៉ូមចម្រាញ់រួចរហូតដល់ ៦០% បានកើនឡើង ៩២,៥គីឡូក្រាមក្នុងត្រីមាសមុន ដល់កម្រិត ២៧៤,៨គីឡូក្រាម នេះបើតាមរបាយការណ៍សម្ងាត់របស់ IAEA ដោយគូសបញ្ជាក់ថា ប្រសិនបើពង្រឹងបន្ថែមទៀត តាមទ្រឹស្ដីតួលេខនេះគឺគ្រប់គ្រាន់ហើយសម្រាប់គ្រាប់បែកនុយក្លេអ៊ែរចំនួន ៦គ្រាប់៕