បេសកជនពិសេសរបស់អង្គការសហប្រជាជាតិសម្រាប់យេម៉ែនលោក Hans Grundberg កាលពីថ្ងៃពុធបានសង្កត់ធ្ងន់លើតម្រូវការបន្ទាន់សម្រាប់ការសម្របសម្រួល ក្នុងតំបន់និងអន្តរជាតិ ដើម្បីបង្កើតលក្ខខណ្ឌសម្រាប់ «សន្តិភាពយូរអង្វែងនិងទូលំទូលាយ» នៅក្នុងប្រទេសយេម៉ែន។ នេះបើយោងតាមសេចក្តីថ្លែងការណ៍ដែលចេញដោយការិយាល័យរបស់លោក។

លោក Grundberg បានធ្វើការអត្ថាធិប្បាយ ក្នុងអំឡុងពេលដំណើរទស្សនកិច្ច ទៅកាន់ទីក្រុងរីយ៉ាដ (Riyadh)នៃប្រទេសអារ៉ាប៊ីសាអ៊ូឌីត ជាកន្លែងដែលលលោកបានចូលរួមវេទិកាមនុស្សធម៌អន្តរជាតិ Riyadh ដែលរៀបចំដោយមជ្ឈមណ្ឌលជួយសង្គ្រោះ និងជំនួយមនុស្សធម៌ King Salman (KSRelief)។ សេចក្តីថ្លែងការណ៍នេះ ត្រូវបានផ្សព្វផ្សាយនៅលើវេទិកាប្រព័ន្ធផ្សព្វផ្សាយសង្គម X។ 

ក្នុងដំណើរទស្សនកិច្ចរបស់ខ្លួន លោក Grundberg បានធ្វើឡើងនូវអ្វីដែលសេចក្តីថ្លែងការណ៍ បានពិពណ៌នា ថាជា «ការពិភាក្សាក្នុងន័យស្ថាបនា» ជាមួយរដ្ឋមន្ត្រីការបរទេសយេម៉ែន លោក Shaya Zindani និងមន្ត្រីផ្សេងទៀត។

សេចក្តីថ្លែងការណ៍នោះ បានឲ្យដឹងថា បេសកជនពិសេសបានគូសបញ្ជាក់ពីសារៈសំខាន់នៃកិច្ចខិតខំប្រឹងប្រែងរួមគ្នា ដើម្បីត្រួសត្រាយផ្លូវសម្រាប់ដំណោះស្រាយនយោបាយយូរអង្វែង ហើយបានជំរុញឲ្យភាគីពាក់ព័ន្ធក្នុងតំបន់ និងពិភពលោកគាំទ្រការសន្ទនា។

លោក Grundberg ក៏បានទាមទារឲ្យមានការដោះលែងជាបន្ទាន់ និងដោយគ្មានលក្ខខណ្ឌនៃបុគ្គលិកអង្គការសហប្រជាជាតិ សកម្មជនសង្គមស៊ីវិល បុគ្គលិកអង្គការក្រៅរដ្ឋាភិបាល និងបុគ្គលិកការទូត ដែលត្រូវបានចាប់ឃុំខ្លួនដោយក្រុមហ៊ួទី នៅរដ្ឋធានី Sanaa ។

ក្រុមហ៊ួទី បានចាប់ខ្លួនបុគ្គលិករាប់សិបនាក់ មកពីទីភ្នាក់ងារអង្គការសហប្រជាជាតិ និងអង្គការជំនួយ ក្នុងស្រុក និងអន្តរជាតិ ក្នុងរយៈពេល ២ឆ្នាំ ចុងក្រោយនេះ។