អ្នកជំនាញ ៤រូបបានប្រាប់សារព័ត៌មានរ៉យទ័រ មុនពេលជំនួបរវាងមេដឹកនាំអ៊ុយក្រែន និងអាមេរិកថា ក្របខណ្ឌកិច្ចព្រមព្រៀងដែលបង្ហាញពីលទ្ធភាពទទួលបានប្រាក់ចំណូលពីធនធានធម្មជាតិរបស់អ៊ុយក្រែន ជាថ្នូរនឹងការធានាសន្តិសុខ មានគម្លាត និងចន្លោះប្រហោងផ្លូវច្បាប់ជាច្រើន ដែលត្រូវតែបំពេញនៅក្នុងកិច្ចចរចានាពេលអនាគត។

ពង្រាងនៃកិច្ចព្រមព្រៀងដែលរំពឹងថានឹងចុះហត្ថលេខានៅថ្ងៃសុក្រ (២៨ កុម្ភៈ) នេះនៅពេលលោកប្រធានាធិបតីអាមេរិក Donald Trump ជួបជាមួយលោក Volodymyr Zelenskiy របស់អ៊ុយក្រែននោះ គូសបញ្ជាក់ពីការបង្កើតមូលនិធិវិនិយោគកសាងឡើងវិញដែលគ្រប់គ្រងដោយអាមេរិក-អ៊ុយក្រែន និងមានភាសាបែបធានា ប៉ុន្តែអាមេរិក មិនផ្តល់ឱ្យទីក្រុងគីវ នូវការធានាសុវត្ថិភាពដែលខ្លួនចង់បានទេ។

កិច្ចព្រមព្រៀងនេះលើកឡើងថា រដ្ឋាភិបាលអ៊ុយក្រែននឹងផ្ដល់ចំណែកប្រាក់ ៥០% នាពេលអនាគតនៃទ្រព្យសម្បត្តិធនធានរ៉ែដែលគ្រប់គ្រងដោយរដ្ឋ ទៅដល់មូលនិធិនោះ ប៉ុន្តែមិនផ្តល់នូវបរិមាណ ពេលវេលា ឬព័ត៌មានលម្អិតពីការគ្រប់គ្រងរបស់មូលនិធិទេ។

អ្នកជំនាញនិយាយថា "នេះបង្កើតបានជាគម្លាតដ៏ធំដែលបង្ហាញពីកាតព្វកិច្ចធ្វើកិច្ចសហប្រតិបត្តិការ ប៉ុន្តែពុំមានការប្តេជ្ញាចិត្តដែលមានចំណងផ្លូវច្បាប់ជាក់លាក់ណាមួយនៃលក្ខណៈការពារក្នុងកិច្ចព្រមព្រៀង ព្រោះអាមេរិកមិនបានផ្តល់ការធានាជាក់ស្តែងឡើយ"។

ទោះពុំមានការធានាសន្តិសុខក៏ដោយ លក្ខខណ្ឌដែលរៀបរាប់ក្នុងក្របខណ្ឌនោះអាចជាការសម្រាលបន្ទុកដល់អ៊ុយក្រែន ព្រោះលោក Trump បានទាមទារថវិកា ៥០០ពាន់លានដុល្លារ ជាសំណងសម្រាប់ការគាំទ្រផ្នែកយោធាដែលផ្តល់ឱ្យរួចទៅហើយក្នុងសង្រ្គាម៕