ប្រទេសចិន នៅថ្ងៃសុក្រ (២៨ កុម្ភៈ) សប្ដាហ៍នេះ បានសម្ដែងការប្រឆាំងយ៉ាងដាច់ខាតលើការគំរាមកំហែងចុងក្រោយរបស់លោកប្រធានាធិបតីអាមេរិក Donald Trump ក្នុងការដាក់ពន្ធបន្ថែម ១០% ទៀតលើការនាំចូលរបស់ចិន ជុំវិញលំហូរគ្រឿងញៀនក្នុងទឹកដីអាមេរិក ដោយប្ដេជ្ញាតបតវិញយ៉ាងឈឺចាប់ និងចោទសេតវិមានថា "ស្តីបន្ទោសអ្នកដទៃផ្ដេសផ្ដាស" និងបង្កអស្ថិរភាពដល់ខ្សែច្រវ៉ាក់ផ្គត់ផ្គង់សកល។

ជាមួយគ្នានេះ ថ្នាក់ដឹកនាំរបស់ចិន នឹងកោះប្រជុំនៅថ្ងៃពុធសប្តាហ៍ក្រោយនេះ សម្រាប់កិច្ចប្រជុំបិទទ្វារដើម្បីរិះរកវិធីទប់ទល់ និងរារាំងផែនការសេដ្ឋកិច្ចដ៏គ្រោះថ្នាក់នោះ ជុំវិញការដំឡើងពន្ធឥតឈប់ឈររបស់មេដឹកនាំអាមេរិករូបនេះ។

លោក Trump បាននិយាយនៅថ្ងៃព្រហស្បតិ៍ថា ការដំឡើងពន្ធ ២៥% របស់លោកលើទំនិញម៉ិកស៊ិក និងកាណាដា នឹងចូលជាធរមាននៅថ្ងៃអង្គារសប្ដាហ៍ក្រោយ រួមជាមួយនឹងពន្ធដំឡើង ១០% ថ្មីលើការនាំចូលរបស់ចិន ពីលើពន្ធបន្ថែមដែលមានស្រាប់ ១០% ដែលលោកបានដាក់កាលពីថ្ងៃទី០៤ ខែកុម្ភៈ។

អ្នកនាំពាក្យក្រសួងពាណិជ្ជកម្មចិន បាននិយាយនៅក្នុងសេចក្តីថ្លែងការណ៍មួយថា "ពន្ធឯកតោភាគីរបស់អាមេរិក រំលោភលើច្បាប់អង្គការពាណិជ្ជកម្មពិភពលោក WTO និងធ្វើឱ្យខូចដល់ប្រព័ន្ធពាណិជ្ជកម្មពហុភាគី។ ឥឡូវនេះ សហរដ្ឋអាមេរិក ជាថ្មីម្តងទៀតកំពុងគំរាមដាក់ពន្ធបន្ថែម ហើយឥរិយាបថនេះគឺគ្មានអ្វីក្រៅពីការបង្វែរការស្តីបន្ទោសដាក់អ្នកដទៃ និងភាពគ្មានការទទួលខុសត្រូវរបស់ខ្លួននោះទេ"៕