អ៊ីរ៉ង់កាលពីថ្ងៃព្រហស្បតិ៍ បានថ្កោលទោសយ៉ាងដាច់អហង្ការ ចំពោះការវាយប្រហារតាមអាកាសរបស់អ៊ីស្រាអែល នៅភាគខាងត្បូងប្រទេសស៊ីរី និងនៅជិតទីក្រុងដាម៉ាស ដោយអំពាវនាវឲ្យមានចំណាត់ការពី អន្តរជាតិ ដើម្បីបញ្ឈប់«ការឈ្លានពាន»របស់អ៊ីស្រាអែល។

នៅក្នុងសេចក្តីថ្លែងការណ៍មួយចេញផ្សាយដោយក្រសួងនេះ អ្នកនាំពាក្យក្រសួងការបរទេសអ៊ីរ៉ង់លោក Esmaeil Baghaei បានរិះគន់ការវាយប្រហារដែលធ្វើឡើងដោយយន្តហោះចម្បាំងអ៊ីស្រាអែល កាលពីយប់ថ្ងៃអង្គារ ដោយបានកំណត់លើគោលដៅជាច្រើនកន្លែង។

លោក Baghaei បាននិយាយថា៖«យើងព្រមានប្រឆាំងនឹងការបន្តនៃសកម្មភាពពង្រីក និងឈ្លានពានរបស់អ៊ីស្រាអែល នៅក្នុងទឹកដីស៊ីរី» ដោយជំរុញឲ្យសហគមន៍អន្តរជាតិ និងរដ្ឋមូស្លីមចាត់វិធានជាបន្ទាន់និងយ៉ាងម៉ឺងម៉ាត់ ដើម្បីថ្កោលទោស និងបញ្ឈប់ «ការបំពានច្បាប់» របស់អ៊ីស្រាអែល។

លោកបានលើកឡើងពី «ការរំលោភជាញឹកញាប់» របស់អ៊ីស្រាអែលនៃកិច្ចព្រមព្រៀងបញ្ចប់សង្គ្រាមឆ្នាំ ១៩៧៤ រវាងអ៊ីស្រាអែល និងស៊ីរី ដោយបញ្ជាក់ថា ការវាយប្រហារនេះ គឺជា«ការរំលោភលើគោលការណ៍នៃធម្មនុញ្ញអង្គការសហប្រជាជាតិ និងច្បាប់អន្តរជាតិ»។