អ៊ីរ៉ង់៖ យោងតាមអ្នកចរចាជាន់ខ្ពស់របស់ទីក្រុងតេអេរ៉ង់ សហរដ្ឋអាមេរិកត្រូវតែ "ទទួលយកការពិត" និងយល់ព្រមដកទណ្ឌកម្មរបស់ខ្លួនលើអ៊ីរ៉ង់ ក្នុងអំឡុងពេលកិច្ចចរចានុយក្លេអ៊ែរនៅសប្តាហ៍ក្រោយនៅទីក្រុងវីយែន ប្រទេសអូទ្រីស។
តំណាងប្រទេសអ៊ីរ៉ង់ និងប្រទេសហត្ថលេខីផ្សេងទៀតនៃកិច្ចព្រមព្រៀងនុយក្លេអ៊ែរឆ្នាំ២០១៥ របស់ខ្លួននឹងមានវត្តមាននៅក្នុងប្រទេសអូទ្រីសចាប់ពីថ្ងៃទី២៩ ខែវិច្ឆិកា ដើម្បីព្យាយាមស្តារផែនការសកម្មភាពរួមគ្រប់ជ្រុងជ្រោយ (JCPOA) ដែលសហរដ្ឋអាមេរិកបានបោះបង់ចោលកាលពីឆ្នាំ២០១៨។ អ៊ីរ៉ង់ ចិន រុស្ស៊ី ចក្រភពអង់គ្លេស បារាំង និងអាល្លឺម៉ង់នឹងបន្តកិច្ចចរចាជុំទី៦ ដែលបានបញ្ឈប់ក្នុងខែមិថុនាដើម្បីអនុញ្ញាតឱ្យប្រធានាធិបតីថ្មីរបស់អ៊ីរ៉ង់លោក Ebrahim Raisi បង្កើតរដ្ឋបាលរបស់លោក។ ដូចកាលពីកន្លងទៅដែរ ភាគីសហរដ្ឋអាមេរិកនឹងចូលរួមដោយប្រយោលក្នុងការចរចាដែលថា ប្រសិនបើជោគជ័យនឹងឃើញទណ្ឌកម្មដ៏តឹងរ៉ឹងរបស់អាមេរិកលើអ៊ីរ៉ង់ត្រូវបានដកចេញ ហើយនាំអ៊ីរ៉ង់ត្រឡប់ទៅការអនុលោមតាមលក្ខខណ្ឌនៃកិច្ចព្រមព្រៀងនោះ។
កន្លងមកអ៊ីរ៉ង់បាននិយាយថា ខ្លួនបានត្រៀមខ្លួនរួចជាស្រេចសម្រាប់ "កិច្ចព្រមព្រៀងល្អ" នៅទីក្រុងវីយែន ប៉ុន្តែសហរដ្ឋអាមេរិកត្រូវតែទទួលយកការទទួលខុសត្រូវ ចំពោះការដើរចេញពីផែនការសកម្មភាពរួមគ្រប់ជ្រុងជ្រោយ ឬ JCPOA ដោយដកទណ្ឌកម្មទាំងអស់ដែលបានដាក់តាំងពីឆ្នាំ២០១៨ មក ហើយធានាថាខ្លួននឹងមិនចាកចេញពីកិច្ចព្រមព្រៀងនេះទៀតឡើយ។ នៅសល់ពេលជិត ១សប្ដាហ៍ទៀត មុនការចរចានុយក្លេអ៊ែរអ៊ីរ៉ង់ជាមួយប្រទេសលោកខាងលិច យោធាអ៊ីរ៉ង់បានសំញែងសាច់ដុំខាងយោធាដោយចាប់ផ្ដើមហ្គេមសង្គ្រាមប្រចាំឆ្នាំរបស់ខ្លួន នៅក្នុងតំបន់ឆ្នេរនៃឈូងសមុទ្រអូម៉ង់៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
