ក្រសួងការងារ និងបណ្តុះបណ្តាលវិជ្ជាជីវៈ បានឲ្យដឹងថា គិតត្រឹមឆ្នាំ២០២៤ ប្រជាពលរដ្ឋ​ខ្មែរ​ដែល​កំពុង​រស់​នៅ និងធ្វើការងារនៅក្រៅប្រទេសមានចំនួន ១,៣៨លាននាក់ ដែលបានផ្តល់​ប្រាក់​ចំណូល​ស​រុបប្រមាណ ៥ពាន់លានដុល្លារអាម៉េរិកក្នុងមួយឆ្នាំ ក្នុងនោះ​បាន​ផ្ញើរ​ប្រាក់​បញ្ញើ​ត្រឡប់​មក​ប្រទេស​វិញចំនួនប្រមាណ ២,៩៥ពាន់លានដុល្លារអាម៉េរិក។

យោងតាមរបាយការណ៍ការរបស់ក្រសួងការងារ និងបណ្តុះបណ្តាលវិជ្ជាជីវៈ បានបង្ហាញ​ឲ្យ​ដឹង​ក្នុង​ឱកាស​ប្រារព្ធពិធីសន្និបាតបូកសរុបលទ្ធផលការងារឆ្នាំ២០២៤ និងលើកទិស​ដៅ​ការងារ​ឆ្នាំ​២០២៥​ កាលពីសប្តាហ៍កន្លងទៅថា ក្នុងចំណោមលទ្ធផលការងារជាច្រើន ដែលក្រសួងការងារ ខិត​ខំ​ប្រឹងប្រែងសម្រេចបានទាំងនោះ ក្នុងឆ្នាំ២០២៤ ក្រសួង​ក៏​បាន​ស្វែង​រក​ឱកាស​ការងារ​ជូន​ប្រជា​ពលរដ្ឋនៅក្រៅប្រទេសបានចំនួនជាង ៤ម៉ឺន ៤ពាន់នាក់ តាមវិស័យឧស្សាហកម្ម, កសិកម្ម, សំណង់, ការងារផ្ទះ និងការងារផ្សេងៗ។ ក្នុងនោះ ពលករកម្ពុជា​បាន​មាតុភូមិ​និវត្តន៍​មក​មាតុ​ប្រទេស​វិញ​ចំនួនជាង ១ម៉ឺន ៨ពាន់នាក់ ដែលធ្វើឱ្យពលករកម្ពុជាដែលបានកំពុងស្នាក់នៅ និង​ធ្វើ​ការ​នៅ​បរទេស បានកើនឡើងប្រមាណពី ១,៣៥លាននាក់ នៅឆ្នាំ២០២៣ ដល់ប្រមាណ ១,៣៨​លាន​នាក់ នៅឆ្នាំ២០២៤ ដែលធ្វើឱ្យប្រាក់​បញ្ញើ​ត្រឡប់​មក​ប្រទេស​វិញ​បាន​កើត​ពី​ប្រមាណ ​២,៩៤ពាន់លានដុល្លារអាម៉េរិក ក្នុងឆ្នាំ២០២៣ ដល់ប្រមាណ ២,៩៥ពាន់​លាន​ដុល្លារ​អាម៉េរិក នៅឆ្នាំ២០២៤។

របាយការណ៍ដដែលនេះ បានបន្ថែមថា បើបូករួម​ពី​ការ​ចំណាយ​ដែល​ពលករ​បាន​ចាយ​ផ្ទាល់​ប្រមាណ ​១ ៥០០ដុល្លារអាម៉េរិក មានន័យថា ឱកាសការងារ​ធ្វើ​នៅ​ក្រៅ​ប្រទេស​បាន​ផ្តល់​ប្រាក់​ចំណូល​ប្រមាណ ៥ពាន់លានដុល្លារអាម៉េរិក ក្នុងមួយឆ្នាំ ដែលបានចូល​រួម​ចំណែក​យ៉ាង​សំខាន់​ក្នុង​ការ​លើកកម្ពស់ជីវភាពគ្រួសាររបស់ប្រជាជន ព្រមទាំងចូលរួម​ចំណែក​ក្នុង​ការ​លើក​កម្ពស់​សុខភាព និងការអប់រំរបស់សមាជិកគ្រួសារនៃពលករទេសន្តរប្រវេសន៍កម្ពុជា។

សូមបញ្ជាក់ថា គិតត្រឹមបំណាច់ឆ្នាំ២០២៤ ចំនួនពលករកម្ពុជាទៅធ្វើការនៅបរទេសសរុប ៤៤,៨៦២នាក់ មានដូចជា៖ ប្រទេសថៃ ៣០,៥៩០នាក់, សាធារណរដ្ឋកូរ៉េ (កូរ៉េខាងត្បូង) ៩,០៣៦នាក់, ជប៉ុន ៥,០៩៣នាក់, សិង្ហបុរី ៣៤នាក់, តំបន់រដ្ឋបាលពិសេសហុងកុង ៣១នាក់ និង​ប្រទេសអារ៉ាប៊ីសាអូឌីត ៧៨នាក់៕ អត្ថបទ៖ ឈិត បូរ៉ាវី