វិមានក្រឹមឡាំង នៅថ្ងៃចន្ទ (ទី៣ ខែមីនា) បានប្រាប់ឲ្យដឹងថា ការសន្យាដែលធ្វើឡើងដោយបណ្ដាមេដឹកនាំអឺរ៉ុប នៅឯកិច្ចប្រជុំកំពូល នាទីក្រុងឡុងដ្រ៍ ប្រទេសអង់គ្លេស ស្តីពីអ៊ុយក្រែន កាលពីចុងសប្តាហ៍កន្លងមក ដើម្បីបង្កើនមូលនិធិដល់ទីក្រុងគីវ នឹងមិនជួយនាំមកនូវដំណោះស្រាយដោយសន្តិវិធី ចំពោះជម្លោះនោះទេ។

គួរបញ្ជាក់ថា ប្រធានាធិបតីអ៊ុយក្រែន លោក Volodymyr Zelenskiy បានជួបជាមួយនាយករដ្ឋមន្ត្រីអង់គ្លេស លោក Keir Starmer និងបណ្ដាមេដឹកនាំលោកខាងលិចផ្សេងទៀត កាលពីថ្ងៃអាទិត្យ (ទី២ ខែមីនា) ជាកន្លែងដែលពួកគេបានព្រមព្រៀងរៀបចំនូវផែនការសន្តិភាព នៅអ៊ុយក្រែន ដើម្បីដាក់បង្ហាញទៅសហរដ្ឋអាមេរិក ពោលគឺមានរយៈពេល ២ថ្ងៃបន្ទាប់ពីលោក Zelenskiy បានប៉ះទង្គិចជាមួយប្រធានាធិបតី លោក Donald Trump ក្នុងកិច្ចប្រជុំពិសេស នៅសេតវិមាន។

អ្នកនាំពាក្យវិមានក្រឹមឡាំង លោក Dmitry Peskov បានលើកឡើងថា ការសន្យាផ្តល់មូលនិធិពីបណ្ដាមេដឹកនាំអឺរ៉ុប ក្នុងនោះរួមទាំងកិច្ចព្រមព្រៀងផ្ដល់មីស៊ីលការពារដែនអាកាសតម្លៃ ២ពាន់លានដុល្លារពីចក្រភពអង់គ្លេសផងដែរ នឹងធ្វើឲ្យសង្រ្គាមកាន់តែអូសបន្លាយបន្ថែមទៀត។

លោក Peskov បានប្រាប់អ្នកសារព័ត៌មានថា៖ «ការជួបប្រជុំនេះ ច្បាស់ណាស់មិនទាក់ទងនឹងផែនការសន្តិភាពនោះទេ ប៉ុន្តែនឹងអនុញ្ញាតឲ្យមាន «ការបន្តនូវអរិភាព»។

លោក Peskov បានសង្កត់ធ្ងន់ថា៖ «គំនិតផ្តួចផ្តើមស្ថាបនាណាមួយ (ដើម្បីសន្តិភាព) នឹងត្រូវបានទាមទារឥឡូវនេះ។ វាមានសារៈសំខាន់ខ្លាំងណាស់ ដែលត្រូវមាននរណាម្នាក់បង្ខំឲ្យលោក Zelenskiy ផ្ទាល់ ផ្លាស់ប្តូរគោលជំហររបស់ខ្លួន។ គាត់មិនចង់បានសន្តិភាពទេ។ ដូច្នេះ ត្រូវតែមាននរណាម្នាក់ធ្វើឲ្យលោក Zelenskiy ចង់បានសន្តិភាព»៕