ប្រធានាធិបតីអាមេរិក លោក Donald Trump បានបង្ហើបកាលពីថ្ងៃចន្ទ (០៣ មីនា) ថា កិច្ចព្រមព្រៀងធនធានរ៉ែរបស់អ៊ុយក្រែន សម្រាប់ការវិនិយោគរបស់សហរដ្ឋអាមេរិក នៅតែអាចធ្វើទៅបាន ទោះបីជាមានការខកចិត្តរបស់លោកជាមួយទីក្រុងគីវក៏ដោយ ខណៈមេដឹកនាំអឺរ៉ុបបានលើកឡើងនូវសំណើសម្រាប់បទឈប់បាញ់រយៈពេលខ្លីក្នុងសង្គ្រាមរបស់រុស្ស៊ី ជាមួយប្រទេសជិតខាងរបស់ខ្លួន។

រដ្ឋបាលលោក Trump ចាត់ទុកកិច្ចព្រមព្រៀងបែបនេះថាជាមធ្យោបាយរបស់អាមេរិក ក្នុងការទទួលបានមកវិញនូវទឹកប្រាក់រាប់រយពាន់លានដុល្លារដែលខ្លួនបានផ្តល់ឱ្យអ៊ុយក្រែន ជាជំនួយផ្នែកហិរញ្ញវត្ថុ និងយោធា ចាប់តាំងពីរុស្ស៊ី បានបើកប្រតិបត្តិការយោធាពិសេសកាលពីបីឆ្នាំមុនមក។

ប៉ុន្តែការប៉ះទង្គិចពាក្យសម្ដីគ្នាយ៉ាងតានតឹងនៅក្នុងការិយាល័យប្រធានាធិបតី Oval Office កាលពីសប្តាហ៍មុន រវាងលោក Trump និងប្រធានាធិបតីអ៊ុយក្រែន លោក Volodymyr Zelenskiy បានធ្វើឱ្យលទ្ធភាពនៃកិច្ចព្រមព្រៀងនេះប្រឈមការសង្ស័យ។ នៅពេលត្រូវបានសួរកាលពីថ្ងៃចន្ទ ថាតើកិច្ចព្រមព្រៀងនេះបានរលាយបាត់ឬយ៉ាងណា លោក Trump ឆ្លើយថា "ទេ លោកមិនគិតដូច្នេះទេ"។

លោក Trump បានពិពណ៌នាថា "នេះជាកិច្ចព្រមព្រៀងដ៏អស្ចារ្យមួយសម្រាប់ភាគីទាំងពីរ" ហើយបាននិយាយថា លោកនឹងផ្តល់ព័ត៌មានថ្មីៗពីស្ថានការណ៍នេះនៅយប់ថ្ងៃអង្គារ (០៤ មីនា) នេះ។ លោក Trump បានកែប្រែគោលនយោបាយអាមេរិកលើអ៊ុយក្រែន និងរុស្ស៊ី បន្ទាប់ពីចូលកាន់តំណែងកាលពីខែមករា ដោយប្រកាន់ជំហរសម្របសម្រួលបន្ថែមទៀតជាមួយទីក្រុងមូស្គូ ដែលធ្វើឱ្យទីក្រុងគីវ និងសម្ព័ន្ធមិត្តអឺរ៉ុប ព្រួយបារម្ភ៕