ក្រសួងពាណិជ្ជកម្មរបស់ចិន នៅថ្ងៃអង្គារ (០៤ មីនា) នេះ បានប្តេជ្ញាសងសឹកយ៉ាងខ្លាំងក្លាប្រឆាំងនឹងការដំឡើងពន្ធនាំចូលថ្មីរបស់សហរដ្ឋអាមេរិក ដែលគ្រោងនឹងចូលជាធរមាននៅល្ងាចនេះ ដោយបញ្ជាក់ពីជំហររបស់ខ្លួនថា រដ្ឋបាលលោកប្រធានាធិបតី Donald Trump កំពុងព្យាយាម "បង្វែរការស្តីបន្ទោសដាក់អ្នកដទៃ" និង "សម្លុតធ្វើបាប" ទីក្រុងប៉េកាំង ជុំវិញលំហូរសារធាតុញៀនហ្វង់តានីល។

លោក Trump បានគំរាមដាក់ពន្ធបន្ថែម ១០% ថ្មីលើចិន ដោយកាលពីសប្ដាហ៍មុនត្រូវបានគេរំពឹងថានឹងចូលជាធរមាននៅម៉ោងសកល ០៥:០១ ក្នុងថ្ងៃ០៤ មីនា នេះ ដែលនាំឱ្យពន្ធបន្ថែមសរុបកើនឡើងដល់ ២០% ជាការឆ្លើយតបទៅនឹងអ្វីដែលសេតវិមានចាត់ទុកថាជាភាពអសកម្មរបស់ចិន ជុំវិញលំហូរគ្រឿងញៀន។ ពន្ធនេះតំណាងឱ្យការដំឡើងថ្លៃបន្ថែមចំពោះពន្ធមានស្រាប់លើទំនិញចិនរាប់ពាន់មុខ។

កាសែត Global Times បានរាយការណ៍កាលពីថ្ងៃចន្ទថា ចិនកំពុងដាក់គោលដៅលើផលិតផលកសិកម្ម និងអាហាររបស់អាមេរិក ហើយនឹងវាយបកវិញជាមួយនឹងពន្ធជាបន្តបន្ទាប់ រួមទាំងវិធានការមិនពន្ធផងដែរ។ ក្រសួងពាណិជ្ជកម្មបាននិយាយនៅក្នុងសេចក្តីថ្លែងការណ៍មួយថា "ចិន បាននិយាយម្តងហើយម្តងទៀតថា ពន្ធឯកតោភាគីរបស់អាមេរិក បានបំពានច្បាប់របស់អង្គការពាណិជ្ជកម្មពិភពលោក WTO និងធ្វើឱ្យខូចដល់ប្រព័ន្ធពាណិជ្ជកម្មពហុភាគី"។

ក្រសួងបន្ថែមថា វិធានការបែបនេះនឹងមិនដោះស្រាយបញ្ហារបស់អាមេរិកទេ ប៉ុន្តែផ្ទុយទៅវិញ នឹងធ្វើឱ្យប៉ះពាល់ដល់កិច្ចសហប្រតិបត្តិការសេដ្ឋកិច្ច និងពាណិជ្ជកម្មរវាងចិន-អាមេរិក និងរំខានដល់ពាណិជ្ជកម្មអន្តរជាតិជាប្រចាំ។ ចិន ជំរុញឱ្យអាមេរិក "ដកជាបន្ទាន់" នូវវិធានការពន្ធឯកតោភាគីមិនសមហេតុផល និងគ្មានមូលដ្ឋានរបស់ខ្លួន ដែលបង្កគ្រោះថ្នាក់ដល់អ្នកដទៃ៕