សង្រ្គាមពាណិជ្ជកម្មពិភពលោក បានផ្ទុះឡើងយ៉ាងតានតឹង នៅពេលដែលការដំឡើងពន្ធ ២៥% របស់លោកប្រធានាធិបតីអាមេរិក Donald Trump លើម៉ិកស៊ិក និងកាណាដា បានចូលជាធរមាននៅថ្ងៃអង្គារ ០៤ មីនា នេះ រួមជាមួយនឹងការដំឡើងពន្ធទ្វេដងលើការនាំចូលរបស់ចិនទាំងអស់ដល់ ២០% ពីតួលេខ ១០% ពីមុន ក្នុងសកម្មភាពមិនធម្មតាមួយដែលគំរាមកំហែងធ្វើឱ្យសេដ្ឋកិច្ចអាមេរិកខាងជើងចុះខ្សោយ រួមទាំងសហរដ្ឋអាមេរិកផ្ទាល់ផងដែរ។

ពន្ធបន្ថែម ដែលអាចបំផ្លាញជិត ២,២សែនកោដិ៍ដុល្លារនៅក្នុងពាណិជ្ជកម្មប្រចាំឆ្នាំពីរផ្លូវរបស់អាមេរិកនេះ បានចូលជាធរមាននៅម៉ោង ១២:០១ រំលងអាធ្រាត្រឈានចូលថ្ងៃអង្គារ ០៤ មីនា (ម៉ោងក្នុងស្រុក) ប៉ុន្មានម៉ោងប៉ុណ្ណោះបន្ទាប់ពីលោក Trump ប្រកាសថា ប្រទេសទាំងបីធ្វើមិនបានគ្រប់គ្រាន់ដើម្បីទប់ស្កាត់លំហូរនៃសារធាតុញៀនហ្វង់តានីលចូលទៅអាមេរិក។

ចិន បានឆ្លើយតបភ្លាមៗដោយប្រកាសពន្ធបន្ថែមពី ១០% ទៅ ១៥% លើការនាំចូលមួយចំនួនរបស់អាមេរិក ចាប់ពីថ្ងៃទី១០ ខែមីនា និងការរឹតបន្តឹងការនាំចេញថ្មីជាបន្តបន្ទាប់ សម្រាប់អង្គភាពរបស់អាមេរិកដែលបានកំណត់។ កាណាដា និងម៉ិកស៊ិក ដែលរីករាយនឹងទំនាក់ទំនងពាណិជ្ជកម្មស្ទើរតែគ្មានពន្ធជាមួយអាមេរិកអស់ ៣ទស្សវត្សមកហើយនោះ បានត្រៀមខ្លួនរួចជាស្រេចដើម្បីសងសឹកភ្លាមៗប្រឆាំងនឹងសម្ព័ន្ធមិត្តយូរអង្វែងរបស់ពួកគេ។

ពន្ធបន្ថែមថ្មីនេះបានកើតឡើងស្របពេលដែលអតិផរណាអាមេរិកនៅតែរឹងរូស ហើយប្រជាជន និងសេដ្ឋកិច្ចអាមេរិកទាំងមូល កំពុងស្ថិតនៅលើមូលដ្ឋានដ៏រង្គោះរង្គើបំផុត ដូចដែលបានបង្ហាញដោយទិន្នន័យសេដ្ឋកិច្ចទន់ខ្សោយថ្មីៗនេះ៕