ក្រុមមន្ត្រីបាននិយាយថា មនុស្សរាប់ពាន់នាក់ ត្រូវបានជម្លៀសចេញនៅក្នុងរដ្ឋធានីហ្សាកាតា របស់ប្រទេសឥណ្ឌូនេស៊ី កាលពីថ្ងៃអង្គារ (០៤ មីនា) បន្ទាប់ពីទឹកជំនន់ដ៏ធ្ងន់ធ្ងរបានលេបត្របាក់តំបន់នេះ ជាមួយនឹងភ្លៀងធ្លាក់ខ្លាំង ដែលរំពឹងថានឹងបន្តរហូតដល់សប្តាហ៍ក្រោយ។

ទីភ្នាក់ងារគ្រោះមហន្តរាយរបស់ប្រទេសនេះ បាននិយាយនៅក្នុងសេចក្តីថ្លែងការណ៍មួយថា ភ្លៀងធ្លាក់ខ្លាំងចាប់តាំងពីថ្ងៃចន្ទសប្ដាហ៍នេះមក បានបង្កឱ្យមានទឹកជំនន់កម្ពស់រហូតដល់ ៣ម៉ែត្រ ទាំងនៅក្នុង និងជុំវិញទីក្រុងហ្សាកាតា ដោយបានបិទផ្លូវមួយចំនួន និងបានជន់លិចលំនៅឋានជាង ១.០០០ខ្នង និងរថយន្តជាច្រើនគ្រឿង។

អភិបាលក្រុងហ្សាកាតា លោក Pramono Anung បានបង្កើនការប្រកាសអាសន្ននដល់កម្រិតខ្ពស់បំផុតទីពីរនៃដំណាក់កាលធ្ងន់ធ្ងរខ្លាំង ដោយអំពាវនាវដល់រដ្ឋាភិបាលក្នុងតំបន់ឱ្យដំណើរការម៉ាស៊ីនបូមទឹក ដើម្បីបូមទឹកចេញពីតំបន់ជន់លិច និងអនុវត្តការកែតម្រូវផ្នែកអាកាសធាតុ ដែលជាធម្មតារួមបញ្ចូលទាំងការបាញ់ផ្សែងអំបិលចូលទៅក្នុងពពកឱ្យបង្កជាភ្លៀងមុនពេលធ្លាក់ដល់ដី ដើម្បីបញ្ចៀសភ្លៀងធ្លាក់ខ្លាំងយ៉ាងគំហុក។

ទីភ្នាក់ងារអាកាសធាតុព្រមានថា ភ្លៀងធ្លាក់ខ្លាំងត្រូវបានព្យាករថានឹងវាយប្រហាររដ្ឋធានីឥណ្ឌូនេស៊ីមួយនេះ និងទីក្រុងជុំវិញនោះរហូតដល់ថ្ងៃទី១១ ខែមីនា។ រដ្ឋមន្ត្រីក្រសួងសង្គមកិច្ចឥណ្ឌូនេស៊ី បានប្រកាសថា រដ្ឋាភិបាលបានចាប់ផ្តើមសាងសង់ជម្រកបណ្តោះអាសន្ន និងចែកចាយស្បៀងអាហារ សម្លៀកបំពាក់ និងថ្នាំពេទ្យសម្រាប់អ្នកដែលត្រូវបានជម្លៀសក្នុងគ្រោះធម្មជាតិនេះ៕