កម្មវិធីស្បៀងអាហារពិភពលោក WFP បានព្រមានកាលពីថ្ងៃអង្គារ (០៤ មីនា) ថា មនុស្សមួយលាននាក់ទៀតនៅក្នុងប្រទេសសូម៉ាលី អាចប្រឈមនឹងវិបត្តិនៃភាពអត់ឃ្លានធ្ងន់ធ្ងរនៅក្នុងប៉ុន្មានខែខាងមុខនេះ ដោយសារតែការព្យាករគ្រោះរាំងស្ងួតក្នុងអំឡុងពេលរដូវដាំដំណាំបន្ទាប់។

លោក ហ្សង់ម៉ាទីន បាវអឺ (Jean-Martin Bauer) នាយកផ្នែកសន្តិសុខស្បៀង និងសេវាវិភាគអាហារូបត្ថម្ភរបស់អង្គការ WFP បាននិយាយថា តួលេខនេះអាចកើនឡើងបន្ថែមទៀតដោយសារតែការកាត់បន្ថយមូលនិធិ។ ការសិក្សាមួយបានបង្ហាញថា នៅឆ្នាំ២០២២ តំបន់ញកអាហ្រ្វិក បានប្រឈមមុខនឹងស្ថានភាពរីងស្ងួតបំផុតក្នុងពេលជាង ៤ទសវត្សរ៍ បន្ទាប់ពីរដូវវស្សាដ៏ហួតហែងជាប់ៗគ្នា ដែលបានសម្លាប់មនុស្សរហូតដល់ ៤៣.០០០នាក់ ដោយសារតែវិបត្តិអត់ឃ្លាន។

លោក Bauer លើកឡើងថា "របាយការណ៍ថ្មីៗនេះបានប៉ាន់ប្រមាណថា មនុស្សប្រហែល ៣,៤លាននាក់បច្ចុប្បន្ន កំពុងប្រឈមនឹងអសន្តិសុខស្បៀងធ្ងន់ធ្ងរនៅសូម៉ាលី ហើយតួលេខនោះនឹងកើនឡើងដល់ប្រហែល ៤,៤លាននាក់ ក្នុងប៉ុន្មានខែខាងមុខ" ដោយសំដៅលើដំណាក់កាលទី៣ និងខ្ពស់ជាងនេះ នៅក្នុងប្រព័ន្ធបែងចែកដំណាក់កាលសន្តិសុខស្បៀងរួម។

ដំណាក់កាលទី៣ ត្រូវបានកំណត់ថាជាកម្រិតវិបត្តិនៃភាពអត់ឃ្លាន ខណៈដំណាក់កាលទី៤ ត្រូវបានចាត់ទុកថាជាគ្រាអាសន្ន ហើយដំណាក់កាលទី៥ ចាត់ទុកជាគ្រោះមហន្តរាយ ឬទុរ្ភិក្ស។ WFP និយាយថា ភាពអត់ឃ្លានតែងប៉ះពាល់ដល់កុមារខ្លាំងបំផុត ហើយផ្អែកលើការព្យាករបច្ចុប្បន្ន កុមារចំនួន ១,៧លាននាក់ អាយុក្រោម ៥ឆ្នាំ ត្រូវរំពឹងថានឹងប្រឈមកង្វះអាហារូបត្ថម្ភធ្ងន់ធ្ងររហូតដល់ខែធ្នូ ឆ្នាំ២០២៥៕