សមាជិកសភាបក្សប្រឆាំងរបស់ប្រទេសស៊ែរប៊ី បានគប់គ្រាប់បែកផ្សែង និងប្រើប្រាស់ថ្នាំបាញ់ផ្សែងម្រេចនៅខាងក្នុងសភា កាលពីថ្ងៃអង្គារ (០៤ មីនា) នៅក្នុងការតវ៉ាយ៉ាងហិង្សាប្រឆាំងរដ្ឋាភិបាល និងគាំទ្រក្រុមនិស្សិតដែលកំពុងធ្វើបាតុកម្ម ខណៈសមាជិកសភាមួយរូបបានដាច់សរសៃឈាមខួរក្បាល និងជាច្រើននាក់រងរបួស អំឡុងពេលចលាចលនោះ។

បាតុកម្មរយៈពេល ៤ខែដឹកនាំដោយនិស្សិត ដែលបង្កឡើងដោយការស្លាប់មនុស្ស ១៥នាក់ ដោយសារដំបូលស្ថានីយ៍រថភ្លើងដួលរលំ បានទាក់ទាញគ្រូបង្រៀន កសិករ និងអ្នកផ្សេងទៀតឱ្យចូលរួមការតវ៉ា ដោយនេះបានក្លាយជាការគំរាមកំហែងដ៏ធំបំផុតសម្រាប់លោកប្រធានាធិបតី Aleksandar Vucic ខណៈមនុស្សជាច្រើនបានរិះគន់ពីអំពើពុករលួយយ៉ាងខ្លាំង និងអសមត្ថភាពក្នុងរដ្ឋាភិបាលស៊ែរប៊ី។

នៅក្នុងសម័យប្រជុំនីតិបញ្ញត្តិនោះ បន្ទាប់ពីក្រុមចម្រុះដែលកំពុងកាន់អំណាចដឹកនាំដោយបក្សស៊ែរប៊ីជឿនលឿន (SNS) បានអនុម័តរបៀបវារៈមួយ អ្នកនយោបាយប្រឆាំងមួយចំនួនបានរត់ចេញពីកៅអីរបស់ពួកគេឆ្ពោះទៅកាន់ប្រធានសភា ហើយបានប៉ះទង្គិចជាមួយសន្តិសុខ។

អ្នកផ្សេងទៀតបានគប់គ្រាប់បែកផ្សែង និងប្រើថ្នាំបាញ់ផ្សែងម្រេច។ ការផ្សាយបន្តផ្ទាល់តាមកញ្ចក់ទូរទស្សន៍បានបង្ហាញពីផ្សែងខ្មៅ និងពណ៌ផ្កាឈូក ហុយឡើងយ៉ាងខ្មួលខ្មាញ់នៅខាងក្នុងសភា ដែលបានមើលឃើញការឈ្លោះប្រកែកគ្នាញឹកញាប់ពីមុនមកក្នុងប៉ុន្មានទសវត្សរ៍មកនេះ ចាប់តាំងពីការចាប់ផ្តើមលទ្ធិប្រជាធិបតេយ្យសេរីពហុបក្សក្នុងឆ្នាំ១៩៩០៕