នាយករដ្ឋមន្ត្រី លោក Shigeru Ishiba នៅថ្ងៃពុធ (ទី៥ មីនា) នេះ បានលើកឡើងថា ប្រទេសផ្សេងទៀត មិនមានឥទ្ធិពល ចំពោះការសម្រេចពាក់ព័ន្ធនឹងថវិកាការពារជាតិរបស់ជប៉ុននោះទេ បន្ទាប់ពីបេក្ខជនដែលត្រូវបានជ្រើសរើសដោយប្រធានាធិបតីអាមេរិក លោក Donald Trump សម្រាប់តួនាទីគោលនយោបាយកំពូលរបស់មន្ទីរបញ្ចកោណ បានអំពាវនាវឲ្យទីក្រុងតូក្យូចំណាយបន្ថែមទៀត ដើម្បីប្រជែងជាមួយប្រទេសចិន។

លោក Ishiba បានប្រាប់សភាថា៖ «ប្រទេសជប៉ុនធ្វើការសម្រេច ចំពោះថវិកាការពារជាតិ ដោយខ្លួនឯង។ ការសម្រេចនេះមិនគួរត្រូវបានធ្វើឡើងដោយផ្អែកលើអ្វីដែលប្រទេសផ្សេងទៀតប្រាប់ឲ្យធ្វើនោះទេ»។

ក្នុងឆ្នាំ២០២២ ប្រទេសជប៉ុនបានប្រកាសនូវយុទ្ធសាស្រ្តដំឡើងថវិកាយោធាចំនួន ៤៣សែនកោដិយ៉េន (២៨៧,០៩ពាន់លានដុល្លារ) ក្នុងរយៈពេល ៥ឆ្នាំ ដោយបង្កើនថវិកាការពារជាតិរបស់ខ្លួនទ្វេដងឲ្យដល់ប្រហែល ២ភាគរយនៃផលិតផលក្នុងស្រុកសរុប (GDP) របស់ប្រទេស ដើម្បីទប់ទល់នឹងការគំរាមកំហែងសន្តិសុខដែលកំពុងកើនឡើងពីប្រទេសចិន រុស្ស៊ី និងកូរ៉េខាងជើង។

គូរបញ្ជាក់ថា បេក្ខជនដែលត្រូវបានតែងតាំងដោយរដ្ឋបាលលោក Trump ឲ្យកាន់តួនាទីជាអនុរដ្ឋមន្ត្រីការពារជាតិទទួលបន្ទុកគោលនយោបាយ គឺលោក Elbridge Colby បាននិយាយថា ប្រទេសជប៉ុនគួរតែបង្កើនការចំណាយរបស់ខ្លួន។

នៅក្នុងការឆ្លើយតបជាលាយលក្ខណ៍អក្សរ ចំពោះការមានសំណួរគោលនយោបាយមុន ពីសមាជិកព្រឹទ្ធសភាអាមេរិក លោក Colby បានលើកឡើងថា៖ «ជប៉ុនគួរតែចំណាយយ៉ាងហោចណាស់ ៣ភាគរយនៃ GDP លើវិស័យការពារជាតិឲ្យបានឆាប់តាមដែលអាចធ្វើទៅបាន និងបង្កើនល្បឿននៃការកែប្រែវិស័យយោធារបស់ខ្លួន ដើម្បីផ្តោតលើការការពារជាយុទ្ធសាស្ត្រ ចំពោះប្រជុំកោះរបស់ខ្លួន និងការការពារសមូហភាព ក្នុងតំបន់របស់ខ្លួន»។

យ៉ាងណាក្ដី អ្នកនាំពាក្យជាន់ខ្ពស់របស់រដ្ឋាភិបាលជប៉ុន បានប្រាប់ឲ្យដឹងថា ការអភិវឌ្ឍវិស័យការពារជាតិរបស់ប្រទេស ផ្តល់អាទិភាពដល់គុណភាព ជាងទំហំថវិកា៕