បេសកកម្មគាំទ្រ និងស្ថិរភាពនៃសហភាពអាហ្រ្វិក នៅក្នុងប្រទេសសូម៉ាលី (AUSSOM) បាននិយាយកាលពីថ្ងៃអង្គារថា សមាសភាពនគរបាលរបស់ខ្លួន បានបញ្ចប់ការបណ្តុះបណ្តាលរយៈពេល មួយសប្តាហ៍សម្រាប់មន្ត្រីនគរបាលសូម៉ាលី ដើម្បីពង្រឹងជំនាញរបស់ពួកគេ ក្នុងការទប់ស្កាត់ និងប្រយុទ្ធប្រឆាំងអំពើជ្រុលនិយមហិង្សា។

នាយកដ្ឋានបណ្តុះបណ្តាល និងអភិវឌ្ឍន៍នគរបាលរបស់ AUSSOM បានបណ្តុះបណ្តាលមន្ត្រីចំនួន ១២ នាក់ នៅរដ្ឋ South West ដើម្បីបង្កើនសមត្ថភាពរបស់កងកម្លាំង ក្នុងការធានាសុវត្ថិភាពអាកាសយានដ្ឋានអន្តរជាតិ Shaati Gaduud ដោយការប្រមូលព័ត៌មានសម្ងាត់ និងកំណត់អត្តសញ្ញាណវត្ថុគ្រោះថ្នាក់ដូចជា គ្រឿងផ្ទុះ នៅក្នុងរដ្ឋនេះ។

លោក Alex Magezi ជាគ្រូបង្វឹកឈានមុខគេសម្រាប់សមាភាពនគរបាលរបស់ AUSSOM បាននិយាយនៅក្នុងសេចក្តីថ្លែងការណ៍មួយដែលបានចេញផ្សាយនៅទីក្រុង Mogadishu រដ្ឋធានីនៃប្រទេសសូម៉ាលីថា៖«វគ្គបណ្តុះបណ្តាលទាំងនេះ នឹងកសាងសមត្ថភាព និងបង្កើនជំនាញរបស់អ្នកចូលរួម ក្នុងការទប់ស្កាត់និងប្រយុទ្ធប្រឆាំងអំពើជ្រុលនិយម។

លោក Magezi បាននិយាយថា ការហ្វឹកហ្វឺនជាប់លាប់បែបនេះ មានសារៈសំខាន់ក្នុងការពង្រឹងសន្តិសុខនៅច្រកចូល និងច្រកចេញសំខាន់ៗរបស់ប្រទេសសូម៉ាលី និងដើម្បីជួយរៀបចំកងកម្លាំងសន្តិសុខសូម៉ាលីឲ្យទទួលខុសត្រូវទាំងស្រុងចំពោះសន្តិសុខរបស់ប្រទេសនេះ។