អ្នកការទូតជាង ៧០០នាក់ មកពីក្រសួងការបរទេស និងទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ ឬហៅថាអង្គការ USAID បានរួមគ្នាចុះហត្ថលេខាលើលិខិតមួយច្បាប់ផ្ញើទៅកាន់រដ្ឋមន្ត្រីការបរទេសអាមេរិក លោក Marco Rubio ដើម្បីតវ៉ាចំពោះការរុះរើទីភ្នាក់ងារ USAID ដោយនិយាយថា អវត្តមានអង្គការនេះនឹងធ្វើឱ្យខូចដល់ភាពជាអ្នកដឹកនាំ និងសន្តិសុខរបស់អាមេរិក ហើយនឹងបង្កើតភាពទំនេរនៃអំណាច ដែលចិន និងរុស្ស៊ី អាចទាញយកបាន។

អ្នកការទូតបានសរសេរនៅក្នុងលិខិត ដែលរំពឹងថានឹងត្រូវបានដាក់ទៅកាន់ "បណ្តាញប្រឆាំង" ផ្ទៃក្នុងរបស់ក្រសួងដែលអនុញ្ញាតឱ្យអ្នកការទូតលើកឡើងពីក្ដីបារម្ភលើគោលនយោបាយដោយមិនបញ្ចេញឈ្មោះនោះថា ការបង្កកជំនួយបរទេសស្ទើរតែទាំងអស់នៅថ្ងៃទី២០ ខែមករា របស់រដ្ឋបាលលោកប្រធានាធិបតី Donald Trump បានបង្កគ្រោះថ្នាក់ដល់មន្ត្រីការទូតអាមេរិក និងកងកម្លាំងនៅបរទេស ខណៈធ្វើឱ្យមានគ្រោះថ្នាក់ដល់អាយុជីវិតមនុស្សរាប់លាននាក់នៅបរទេស ដែលពឹងផ្អែកលើជំនួយរបស់សហរដ្ឋអាមេរិក។

លោក Trump បានបន្តធ្វើតាមអ្វីដែលលោកហៅថារបៀបវារៈ "យកអាមេរិកជាធំ" ដោយបញ្ជាឱ្យផ្អាក ៩០ថ្ងៃលើជំនួយបរទេសទាំងអស់នៅថ្ងៃទី២០ ខែមករា នៅពេលលោកទើបចូលកាន់តំណែង។ បទបញ្ជានេះបានបញ្ឈប់ប្រតិបត្តិការរបស់ទីភ្នាក់ងារ USAID ជុំវិញពិភពលោក ដែលបង្កហានិភ័យដល់ការផ្តល់អាហារសង្គ្រោះអាយុជីវិត និងជំនួយផ្នែកវេជ្ជសាស្រ្ដ និងបានធ្វើឱ្យកិច្ចខិតខំប្រឹងប្រែងសង្គ្រោះមនុស្សធម៌ជាសកល ធ្លាក់ចូលទៅក្នុងភាពវឹកវរ៕