អ្នកនាំពាក្យក្រសួងការបរទេសអ៊ីរ៉ង់ លោក Esmaeil Baghaei កាលពីថ្ងៃពុធ បានច្រានចោលការអះអាង «គ្មានមូលដ្ឋាន» របស់មន្ត្រីអង់គ្លេស ដែលថា ទីក្រុងតេអេរ៉ង់ ស្វះស្វែងរកគំរាមកំហែងដល់សន្តិសុខជាតិរបស់ចក្រភពអង់គ្លេស។

លោកបានធ្វើការបដិសេធនៅក្នុងសេចក្តីថ្លែងការណ៍មួយដែលចេញផ្សាយដោយក្រសួង ដើម្បីឆ្លើយតបទៅនឹងសេចក្តីថ្លែងការណ៍ប្រឆាំងអ៊ីរ៉ង់ ដោយរដ្ឋមន្ត្រីសន្តិសុខអង់គ្លេសលោក Dan Jarvis នៅក្នុងសុន្ទរកថាមួយ កាលពីថ្ងៃអង្គារ ទៅកាន់សភារបស់ចក្រភពអង់គ្លេស។

លោក Jarvis បាននិយាយថា លោកនឹងដាក់រដ្ឋអ៊ីរ៉ង់ទាំងមូល រួមទាំងសេវាចារកម្មរបស់ខ្លួន កងឆ្មាំបដិវត្តន៍អ៊ីស្លាម និងក្រសួងស៊ើបការណ៍សម្ងាត់” ទៅក្នុងកម្រិតដែលប្រសើរឡើងនៃគ្រោងការណ៍ចុះបញ្ជីឥទ្ធិពលបរទេសនាពេលខាងមុខ ដែលត្រូវបានរៀបចំឡើងសម្រាប់ការពារប្រឆាំងនឹងឥទ្ធិពលបរទេស។  

លោក Baghaei បានអំពាវនាវឲ្យចក្រភពអង់គ្លេសបញ្ឈប់វិធីសាស្រ្ត «ពុំមានលក្ខណៈស្ថាបនា» របស់ខ្លួន ចំពោះអ៊ីរ៉ង់ និងតំបន់អាស៊ីខាងលិច ដោយបញ្ជាក់ឡើងវិញនូវការប្តេជ្ញាចិត្តរបស់អ៊ីរ៉ង់ ក្នុងការអនុវត្តតាមធម្មនុញ្ញអង្គការសហប្រជាជាតិ និងច្បាប់អន្តរជាតិ ជាពិសេសគោលការណ៍នៃការគោរពគ្នាទៅវិញទៅមក ការមិនជ្រៀតជ្រែកក្នុងកិច្ចការផ្ទៃក្នុងរបស់ប្រទេសដទៃ និងការគោរពច្បាប់ និងបទប្បញ្ញត្តិអន្តរជាតិ។

លោក Baghaei បានជំរុញឲ្យមន្ត្រីអង់គ្លេសបោះបង់ចោល «គោលនយោបាយមិនត្រឹមត្រូវរបស់ពួកគេប្រឆាំងនឹងប្រជាជនអ៊ីរ៉ង់ និងបញ្ឈប់ការផ្សព្វផ្សាយ និងលើកទឹកចិត្តដល់អំពើភេរវកម្ម» «ជំនួសឲ្យការទទូចលើគោលនយោបាយប្រឈមមុខរបស់ពួកគេ និងធ្វើការចោទប្រកាន់ដោយគ្មានមូលដ្ឋានចំពោះអ៊ី    រ៉ង់»។