វិមានក្រឹមឡាំង នៅថ្ងៃព្រហស្បតិ៍ (ទី៦ ខែមីន) នេះ បានលើកឡើងថា ទស្សនៈរបស់រដ្ឋមន្ត្រីការបរទេសអាមេរិក លោក Marco Rubio ដែលថា ជម្លោះអ៊ុយក្រែនជាសង្គ្រាមសំណាង (Proxy War) រវាងសហរដ្ឋអាមេរិក និងរុស្ស៊ី គឺត្រូវគ្នានឹងការវាយតម្លៃផ្ទាល់ខ្លួនរបស់ប្រធានាធិបតីរុស្ស៊ី លោក Vladimir Putin។

គូរបញ្ជាក់ថា នៅក្នុងបទសម្ភាសន៍ជាមួយប្រព័ន្ធផ្សព្វផ្សាយ Fox News កាលពីថ្ងៃពុធ (ទី៥ ខែមីនា) លោក Rubio បានប្រាប់ថា៖ «វាច្បាស់ណាស់តាំងពីដើមដំបូងមកម៉្លេះ ដែល (ប្រធានាធិបតីសហរដ្ឋអាមេរិក លោក Donald Trump) ចាត់ទុករឿងនេះថា ជាជម្លោះអូសបន្លាយ និងជាប់គាំង។ ហើយនិយាយដោយត្រង់ទៅ វាគឺជាសង្រ្គាមតំណាង រវាងមហាអំណាចនុយក្លេអ៊ែរ ពោលគឺរវាងសហរដ្ឋអាមេរិកដែលជួយអ៊ុយក្រែន និងរុស្ស៊ី ហើយវាត្រូវតែឈានដល់ទីបញ្ចប់»។

ដោយគាំទ្រការលើកឡើងនេះ អ្នកនាំពាក្យវិមានក្រឹមឡាំង លោក Dmitry Peskov បាននិយាយថា ទីក្រុងមូស្គូបានយល់ព្រមជាមួយនឹងការវាយតម្លៃរបស់លោក Rubio ហើយបានកត់សម្គាល់ថា រុស្ស៊ីបាននិយាយជាច្រើនដងមកហើយថា សង្រ្គាមនេះ គឺជាជម្លោះ រវាងរុស្ស៊ី និងក្រុមលោកខាងលិចដែលដឹកនាំដោយសហរដ្ឋអាមេរិក។

លោក Peskov បាននិយាយពីការកត់សម្គាល់របស់លោក Rubio ថា៖ «យើងអាច និងចង់យល់ស្របជាមួយការលើកឡើងនេះ ហើយយើងយល់ស្របទាំងស្រុង។ នោះហើយគឺជារបៀបដែលជម្លោះប្រព្រឹត្តទៅ។ យើងបាននិយាយពីរឿងនេះម្តងហើយម្តងទៀត។ យើងបាននិយាយថា នេះគឺពិតជាជម្លោះ រវាងរុស្ស៊ី និងក្រុមលោកខាងលិច។ ហើយប្រទេសដ៏សំខាន់នៃក្រុមលោកខាងលិច គឺសហរដ្ឋអាមេរិក»៕