រដ្ឋអាជ្ញារ៉ូម៉ានី នៅថ្ងៃព្រហស្បតិ៍ (ទី៦ ខែមីនា) នេះ បានប្រាប់ឲ្យដឹងថា ពួកគេបានឃុំខ្លួនមនុស្សចំនួន ៦នាក់ ក្រោមបទចោទប្រកាន់ថា បានព្យាយាមផ្តួលរំលំរដ្ឋ ដោយមានជំនួយពីប្រទេសរុស្ស៊ី ជាលើកឡើងដែលបង្កឲ្យមានភាពតានតឹងកាន់តែខ្លាំងឡើងៗ រវាងទីក្រុង Bucharest (ប៊ុយការ៉េស) និងទីក្រុងមូស្គូ។

ជនសង្ស័យត្រូវបានឃុំខ្លួន កាលពីថ្ងៃពុធ (ទី៥ ខែមីនា) នៅថ្ងៃដដែលដែលរ៉ូម៉ានី សមាជិកនៃអង្គការណាតូ និងសហភាពអឺរ៉ុប បានប្រកាសថា អនុព័ន្ធយោធារបស់ស្ថានទូតរុស្ស៊ី និងអនុប្រធានរបស់គាត់ ជាបុគ្គលមិនត្រូវបានស្វាគមន៍ សម្រាប់អ្វីដែលប្រទេសនេះបានប្រាប់ថា ជាការបំពានច្បាប់ការទូត។ ទីក្រុងមូស្គូបានប្រាប់ថា ខ្លួននឹងឆ្លើយតបទៅនឹងចំណាត់ការនេះ។

អង្គភាពសុភាចារបុរសប្រឆាំងឧក្រិដ្ឋកម្ម DIICOT បានឲ្យដឹងនៅក្នុងសេចក្តីថ្លែងការណ៍ថា៖ «ចាប់ពីឆ្នាំ២០២៣ មក ចុងចោទចំនួន ៥នាក់ រួមជាមួយនឹងជនសង្ស័យម្នាក់ផង បានបង្កើតក្រុមឧក្រិដ្ឋកម្មមួយ ក្នុងគោលបំណងបំផ្លាញអធិបតេយ្យភាព និងឯករាជ្យរបស់រដ្ឋរ៉ូម៉ានី ដោយធ្វើឲ្យខូចដល់សមត្ថភាពការពារជាតិរបស់ប្រទេស»។

ដោយមិនបញ្ចេញឈ្មោះជនសង្ស័យ អង្គភាពនេះ បានបន្ថែមថា៖ «បន្ថែមពីលើនោះ សមាជិកនៃក្រុមឧក្រិដ្ឋជន បានទាក់ទងម្តងហើយម្តងទៀតជាមួយភ្នាក់ងារក្រោមអំណាចបរទេស ដែលមានទីតាំងទាំងនៅក្នុងប្រទេសរូម៉ានី និងសហព័ន្ធរុស្ស៊ី»។

ភ្លាមៗនេះ មិនទាន់មានការអត្ថាធិប្បាយអ្វីឡើយពីរុស្ស៊ី ពាក់ព័ន្ធនឹងការលើកឡើងនេះ៕