អង្គការសហប្រជាជាតិ (UN) បានបញ្ចេញថវិកាចំនួន ១១០លានដុល្លារអាមេរិកពីមូលនិធិសង្គ្រោះបន្ទាន់ ដើម្បីជួយដល់វិបត្តិដែលមិនត្រូវបានអើពើ នៅជុំវិញពិភពលោក ដោយក្នុងនោះរួមទាំងនៅប្រទេសស៊ូដង់ផងដែរ បន្ទាប់ពីម្ចាស់ជំនួយ ដូចជាសហរដ្ឋអាមេរិក បានបញ្ជាឲ្យកាត់បន្ថយក្នុងចំនួនដ៏ធំ។

UN បានព្យាករថា កម្រិតមូលនិធិដែលបានធ្លាក់ចុះជាយូរមកហើយ មុនពេលប្រធានាធិបតីអាមេរិក លោក Donald Trump បានបញ្ជាឲ្យផ្អាកជំនួយបរទេស កាលពីខែមក ត្រូវបានប៉ាន់ប្រមាណថា នឹងធ្លាក់ដល់កម្រិតទាបបំផុតនៅឆ្នាំ២០២៥ នេះ។

រដ្ឋបាលរបស់លោក Trump បានប្រកាសកាលពីខែមុនថា ខ្លួនកំពុងលុបចោលជំនួយ និងកិច្ចសន្យាជំនួយបរទេសជិត ១០.០០០កន្លែង ដែលមានតម្លៃជិត ៦០ពាន់លានដុល្លារ ដោយបញ្ចប់ប្រហែល ៩០ភាគរយនៃការងារសកលរបស់ទីភ្នាក់ងារសហរដ្ឋអាមេរិក សម្រាប់ការអភិវឌ្ឍន៍អន្តរជាតិ (USAID)។

ក្រៅពីសហរដ្ឋអាមេរិក ម្ចាស់ជំនួយផ្សេងទៀត ដូចជាប្រទេសអង់គ្លេសជាដើម ក៏បានប្រកាសកាត់បន្ថយផងដែរ នៅពេលដែលប្រទេសនានា ប្រឈមនឹងសម្ពាធកាន់តែខ្លាំងឡើងៗ ក្នុងការជំរុញដល់ការចំណាយ ក្នុងវិស័យការពារជាតិ។

អគ្គលេខាធិការរងទទួលបន្ទុកកិច្ចការមនុស្សធម៌ និងអ្នកសម្របសម្រួលជំនួយសង្គ្រោះបន្ទាន់ លោក Tom Fletcher បាននិយាយថា៖ «សម្រាប់ប្រទេសដែលរងគ្រោះជម្លោះ បម្រែបម្រួលអាកាសធាតុ និងភាពចលាចលផ្នែកសេដ្ឋកិច្ច ការកាត់បន្ថយមូលនិធិដ៏ធំនេះ មិនមានន័យថា តម្រូវការមនុស្សធម៌ត្រូវរលាយបាត់នោះទេ»។

UN កំពុងស្វែងរកប្រាក់ ៤៥ពាន់លានដុល្លារ ក្នុងឆ្នាំ២០២៥ ដើម្បីជួយមនុស្សប្រហែល ១៨៥លាននាក់ដែលភៀសខ្លួនពីជម្លោះ និងការប្រយុទ្ធប្រឆាំងនឹងភាពអត់ឃ្លាន ជាអ្វីដែលលោក Fletcher បានពិពណ៌នាថា ជា «កម្រិតនៃការឈឺចាប់ដែលមិនធ្លាប់មានពីមុនមក»។ រហូតមកដល់ពេលនេះ ស្ថាប័នអន្តរជាតិដ៏ធំនេះ ទើបទទួលបានទឹកប្រាក់តែ ៥ភាគរយប៉ុណ្ណោះ។

សេចក្តីថ្លែងការណ៍របស់ UN បានបន្ថែមថា ប្រាក់ដែលបានបញ្ចេញពីមូលនិធិឆ្លើយតបគ្រាអាសន្នកណ្តាល នឹងយកទៅជួយសម្រាលវិបត្តិដែលមិនទទួលបានថវិកាគ្រប់គ្រាន់ និងមិនត្រូវបានគេអើពើ នៅទូទាំងទ្វីបអាហ្រ្វិក អាស៊ី និងអាមេរិកឡាទីន៕