​ចិន៖ ប្រទេស​ចិន​បាន​បាញ់​បង្ហោះ​ផ្កាយរណប​អង្កេត​ផែនដី​ថ្មី​មួយពី​មជ្ឈមណ្ឌល​បាញ់​បង្ហោះ​ផ្កាយ​រណប Jiuquan នៅ​ភាគ​ពាយព្យប្រទេស​ចិន​កាលពី​ថ្ងៃ​អង្គារ​។ ផ្កាយរណប​ឈ្មោះ Gaofen-3 02 ត្រូវ​បាន​បាញ់​បង្ហោះ​ដោយ​យាន​ចម្លង Long March-4C នៅ​ម៉ោង 07:45នាទី (​ម៉ោង​នៅ​ទីក្រុង​ប៉េកាំង​) ហើយ​បាន​ចូល​ទៅ​ក្នុង​គន្លង​តារាវិថី​ដែល​បាន​គ្រោង​ទុក​ដោយ​ជោគជ័យ​។​

​ផ្កាយរណប​នេះ​នឹង​ធ្វើ​ប្រតិបត្តិការ​ក្នុង​គន្លង​ប្រព័ន្ធ​ព្រះអាទិត្យ​ ក្នុង​ពេល​ដំណាលគ្នា​នៅ​រយៈកម្ពស់ ៧៥៥គីឡូម៉ែត្រ ហើយ​នឹង​ត្រូវ​បាន​ភ្ជាប់​ជាមួយ​ផ្កាយរណប Gaofen-3 ដែល​ធ្វើដំណើរ​ជុំវិញ​គន្លង​តារាវិថី​នោះ ដើម្បី​បង្កើត​ជា​ក្រុម​ផ្កាយរណប​រ៉ា​ដា​ដែល​ភ្ជាប់​ពី​ដីគោក​ទៅ​សមុទ្រ​។ វា​នឹង​ធ្វើ​អោយ​ប្រសើរ​ឡើង​នូវ​សមត្ថភាព​ត្រួតពិនិត្យ​នៃ​ការសង្កេត​នាវា​សមុទ្រ ក៏ដូចជា​ការ​ត្រួត​ពិនិត្យ​ភាព​អាសន្ន​នៅ​សមុទ្រ និង​បរិស្ថាន​ធម្មជាតិ​ដីគោក ​និង​សមុទ្រ​។

​ផ្កាយរណប​នេះ​នឹង​បម្រើ​ដល់​វិស័យ​ការពារ និង​កាត់បន្ថយ​គ្រោះ​មហន្តរាយ​ដែនសមុទ្រ ការ​ត្រួត​ពិនិត្យ​បរិស្ថាន​សមុទ្រ ការ​ការពារ​បរិស្ថាន ការ​អភិរក្ស​ទឹក កសិកម្ម និង​ឧតុនិយម​។​ ផ្កាយរណប Gaofen-3 02 ត្រូវ​បាន​បង្កើត​ឡើង​ដោយ​បណ្ឌិត្យសភា​បច្ចេកវិទ្យា​អវកាស​ចិន និង​យាន​ចម្លង​ដឹក​ជញ្ជូន​ដោយ​ភ្នាក់ងារ​អវកាស​ចិន Shanghai Academy of Spaceflight Technology។ ការ​បាញ់​បង្ហោះ​នេះ​គឺជា​បេសកកម្ម​លើក​ទី៣៩៨ សម្រាប់​ប្រព័ន្ធ​បញ្ជូន​យាន​ចម្លង​ទៅកាន់​ទី​អវកាស Long March ឬ Changzheng៕

អត្ថបទ៖ សុខមាន