នាយករដ្ឋមន្ត្រីហុងគ្រី លោក Viktor Orban នៅថ្ងៃសុក្រ (ទី៧ ខែមីនា) នេះ បាននិយាយថា សហភាពអឺរ៉ុប (EU) មិនអាចមានលទ្ធភាពផ្តល់ហិរញ្ញប្បទានដល់កិច្ចប្រឹងប្រែងយោធារបស់អ៊ុយក្រែនបានទេ ព្រោះជំនួយហិរញ្ញវត្ថុរបស់សហរដ្ឋអាមេរិកមិនត្រូវបានធានាទៀតឡើយ។

ក្នុងនាមជាសម្ព័ន្ធមិត្តរបស់ប្រធានាធិបតីអាមេរិកលោក Donald Trump ដែលកំពុងបង្កើតទំនាក់ទំនងជាមួយទីក្រុងម៉ូស្គូ លោក Orban បានប្រាប់វិទ្យុរដ្ឋថា រដ្ឋាភិបាលរបស់លោក នឹងចាប់ផ្តើមឲ្យមាន «ការពិគ្រោះយោបល់ជាសាធារណៈ» ក្នុងស្រុក ស្តីពីការចូលជាសមាជិក EU របស់អ៊ុយក្រែន នៅប៉ុន្មានសប្តាហ៍ខាងមុខនេះ។

យុទ្ធនាការនយោបាយដែលផ្តល់មូលនិធិដោយរដ្ឋ នឹងកើតឡើងស្របពេលដែលលោក Orban ដែលកាន់អំណាចតាំងពីឆ្នាំ២០១០ ត្រូវប្រឈមនឹងការបោះឆ្នោត នៅឆ្នាំ២០២៦ ដោយមានសេដ្ឋកិច្ចដែលទើបតែងើបចេញពីវិបត្តិអតិផរណា និងការកើនឡើងនូវប្រជាប្រិយភាពរបស់គណបក្សប្រឆាំងថ្មីដែលជាបញ្ហាប្រឈមខ្លាំងបំផុត ចំពោះការកាន់អំណាចរបស់លោក។

គួរបញ្ជាក់ថា បណ្ដាមេដឹកនាំអឺរ៉ុប កាលពីថ្ងៃព្រហស្បតិ៍ (ទី៦ ខែមីនា) បានគាំទ្រផែនការចំណាយបន្ថែមទៀត ក្នុងវិស័យការពារជាតិ និងបន្តឈរខាងអ៊ុយក្រែន នៅក្នុងពិភពលោក ដែលកំពុងប្រែប្រួលយ៉ាងខ្លាំង ដោយសារការបញ្ច្រាស់គោលនយោបាយអាមេរិករបស់លោក Donald Trump។

ប៉ុន្តែលោក Orban ដែលបានបដិសេធមិនបញ្ជូនអាវុធទៅអ៊ុយក្រែន តាំងពីដើមដំបូងនៃសង្រ្គាម និងបានបន្តរក្សាទំនាក់ទំនងជិតស្និទ្ធជាមួយទីក្រុងមូស្គូ បានលើកឡើងថា ជំនួសឲ្យការអូសបន្លាយសង្រ្គាម អឺរ៉ុបគួរតែគាំទ្រកិច្ចចរចាសន្តិភាពរបស់លោក Trump។ លោកបាននិយាយថា ខណៈដែលចង់បង្កើនការចំណាយលើវិស័យការពារជាតិរបស់អឺរ៉ុបផងដែរនោះ ដូច្នេះ វិធីដែល EU ចង់គាំទ្រអ៊ុយក្រែន នាពេលនេះ នឹង «បំផ្លាញអឺរ៉ុប»៕