ពលរដ្ឋអ៊ីស្រាអែលរាប់ម៉ឺននាក់ បានជួបជុំគ្នាកាលពីថ្ងៃសៅរ៍ នៅមុខក្រសួងការពារជាតិអ៊ីស្រាអែល ស្ថិតក្នុងទីក្រុងតែលអាវីវ ដើម្បីជំរុញឲ្យរដ្ឋាភិបាលទទួលបានកិច្ចព្រមព្រៀងចំណាប់ថ្នូរជាមួយក្រុមហាម៉ាស់ ។

ដំណាក់កាលដំបូងនៃបទឈប់បាញ់រវាងអ៊ីស្រាអែល និងក្រុមជីវពលហាម៉ាស់ប៉ាឡេស្ទីនដែលបានចាប់ផ្តើមកាលពីខែមករា បានបញ្ចប់ទៅកាលពីចុងសប្តាហ៍កន្លងទៅ ដោយគ្មានកិច្ចព្រមព្រៀងចំពោះអ្វីនឹងកើតឡើងបន្ទាប់នោះទេ ។

ក្រុមហាម៉ាស់ និយាយថា ពួកគេប្តេជ្ញាចិត្តចំពោះបទឈប់បាញ់បានព្រមព្រៀងដំបូងដែលត្រូវបានកំណត់ឡើង ដើម្បីឆ្ពោះទៅរកដំណាក់កាលទី ២ ក្នុងនោះកិច្ចចរចាមានគោលដៅបញ្ចប់អចិន្រ្តៃយ៍សង្រ្គាមមួយនេះ ហើយពួកគេច្រានចោលគំនិតបន្តបណ្តោះអាសន្នបទឈប់បាញ់រយៈពេល ៤២ថ្ងៃ ។

ដោយឡែក អ៊ីស្រាអែលនិយាយថា ចំណាប់ថ្នូរទាំងអស់ត្រូវតែប្រគល់មកវិញ ដើម្បីឲ្យការប្រយុទ្ធគ្នាបញ្ឈប់ និងសម្រាប់កិច្ចពិភាក្សាលើដំណាក់កាលទី ២ ចាប់ផ្តើម ។

ក្រុមមន្រ្តីអ៊ីស្រាអែល និយាយថា គណៈប្រតិភូនឹងទៅដល់ប្រទេសកាតា ដើម្បីពិភាក្សាលើវិធីសាស្រ្តបន្ធូរបន្ថយភាពតានតឹង និងធានាថា បិទឈប់បាញ់ បន្តចូលជាធរមាន ។

សូមបញ្ជាក់ថា អ៊ីស្រាអែល បានបិទការចូលរបស់រថយន្តដឹងជំនួយទៅកាន់តំបន់ហ្កាហ្សាកាលពីថ្ងៃអាទិត្យសប្តាហ៍មុន ស្របពេលដែលភាពជាប់គាំងជុំវិញបទឈប់បាញ់បញ្ឈប់ការប្រយុទ្ធគ្នាអស់រយៈពេល ៦សប្តាហ៍កន្លងមកនេះ បានឡើងកម្តៅវិញ ៕