អ្នកស្រុកបាននិយាយថា ការប្រយុទ្ធគ្នារវាងក្រុមឧទ្ទាម M23 និងកងជីវពលគាំទ្ររដ្ឋាភិបាលកុងហ្គោ កំពុងបន្តយ៉ាងតានតឹងកាលពីថ្ងៃអាទិត្យ (០៩ មីនា) នៅតំបន់ Nyabiondo ប្រហែល ១០០គីឡូម៉ែត្រ ភាគខាងជើងទីក្រុង Goma ដែលនៅភាគខាងកើតប្រទេសកុងហ្គោ ប៉ុន្មានថ្ងៃប៉ុណ្ណោះបន្ទាប់ពីអង្គការសហប្រជាជាតិ និងអង្គការក្រៅរដ្ឋាភិបាលរាយការណ៍ថា ការវាយប្រហារដ៏បង្ហូរឈាមមួយនៅក្បែរនោះបានបង្កឱ្យមានការស្លាប់ជនស៊ីវិលយ៉ាងច្រើន។

ក្រុមឧទ្ទាម M23 ដែលគាំទ្រដោយប្រទេសរ្វ៉ាន់ដា បានរឹបអូសយកតំបន់ភាគខាងកើតកុងហ្គោ ដែលសម្បូរទៅដោយសារធាតុរ៉ែ ចាប់តាំងពីដើមឆ្នាំនេះមក។ អាជ្ញាធររដ្ឋបាលក្នុងតំបន់បានប្រាប់សារព័ត៌មានរ៉យទ័រថា "ក្រុម M23 បានវាយយកតំបន់ Nyabiondo តាំងពីម៉ោង ១១ព្រឹក (ម៉ោងក្នុងស្រុកT) បន្ទាប់ពីការប៉ះទង្គិចគ្នា"។

ការប្រយុទ្ធគ្នាបន្ទាប់ពីការប៉ះទង្គិចកាលពីសប្តាហ៍មុននោះរវាងក្រុម M23 និងកងជីវពលរដ្ឋាភិបាលគាំទ្រកុងហ្គោ នៅក្នុងភូមិ Tambi ចម្ងាយប្រហែល ១៨គីឡូម៉ែត្រភាគឦសាននៃទីក្រុង Masisi បាននាំទៅដល់ការវាយប្រហារមួយកាលពីថ្ងៃទី០៥ ខែមីនា និងបណ្តាលឱ្យជនស៊ីវិលជាច្រើននាក់សា្លប់ និងរបួស នេះបើតាមប្រធានអង្គការក្រៅរដ្ឋាភិបាលក្នុងស្រុក ដោយមិនបញ្ជាក់តួលេខលម្អិតឡើយ។

កំណត់ហេតុផ្ទៃក្នុងរបស់អង្គការសហប្រជាជាតិ ដែលមើលឃើញដោយសារព័ត៌មានរ៉យទ័រ កាលពីថ្ងៃអាទិត្យ បាននិយាយថា ជនស៊ីវិលចន្លោះពី ៤០ ទៅ ៧០នាក់ ត្រូវគេជឿថាបានស្លាប់ក្នុងការវាយប្រហារនោះ។ ក្រុមឧទ្ទាម M23 និយាយថា ពួកគេមានបំណងដណ្តើមអំណាចនៅក្នុងរដ្ឋធានីគីនស្ហាសា របស់កុងហ្គោ៕