អ៊ីស្រាអែល បានបញ្ជាឱ្យបញ្ឈប់ជាបន្ទាន់ចំពោះការផ្គត់ផ្គង់អគ្គិសនីរបស់ដែនដីហ្កាហ្សា នៅថ្ងៃអាទិត្យ (០៩ មីនា) ក្នុងកិច្ចខិតខំប្រឹងប្រែងមួយដើម្បីដាក់សម្ពាធក្រុមហាម៉ាស ឱ្យដោះលែងចំណាប់ថ្នូរដែលនៅសេសសល់ ទោះបីជាខ្លួនបានរៀបចំសម្រាប់កិច្ចពិភាក្សាថ្មីអំពីអនាគតនៃបទឈប់បាញ់ហ្កាហ្សា ជាមួយក្រុមសកម្មប្រយុទ្ធប៉ាឡេស្ទីនមួយនេះក៏ដោយ។

ការសម្រេចចិត្តរបស់អ៊ីស្រាអែល កើតឡើងមួយសប្តាហ៍ប៉ុណ្ណោះបន្ទាប់ពីខ្លួនក៏បានរារាំងការផ្គត់ផ្គង់ជំនួយទាំងអស់ទៅកាន់ទឹកដីហ្កាហ្សា ដែលជាជំហានមួយរំឮកដល់ថ្ងៃដំបូងនៃសង្រ្គាម នៅពេលអ៊ីស្រាអែល ប្រកាស "ការឡោមព័ទ្ធ" លើដែនដីប៉ាឡេស្ទីនមួយនេះ។

គួររម្លឹកថា ប៉ុន្មានថ្ងៃបន្ទាប់ពីសង្រ្គាមបានផ្ទុះឡើងនៅថ្ងៃទី០៧ ខែតុលា ឆ្នាំ២០២៣ អ៊ីស្រាអែល បានកាត់ផ្តាច់ចរន្តអគ្គិសនីទៅកាន់តំបន់ហ្កាហ្សា ហើយបានស្ដារឡើងវិញនៅពាក់កណ្តាលឆ្នាំ២០២៤។ ខ្សែថាមពលតែមួយគត់រវាងអ៊ីស្រាអែល និងហ្កាហ្សា ជាបណ្ដាញផ្គត់ផ្គង់រោងចក្រចម្រោះទឹកស្អាត ហើយហ្កាហ្សា ភាគច្រើនពឹងផ្អែកលើបន្ទះស្រូបពន្លឺព្រះអាទិត្យ និងម៉ាស៊ីនភ្លើងដែលប្រើឥន្ធនៈ ដើម្បីផលិតអគ្គិសនី។ ពេលនេះ ប្រជាជនប៉ាឡេស្ទីនរាប់សែននាក់ កំពុងរស់នៅក្នុងតង់នៅទូទាំងដែនដីហ៊ុមព័ទ្ធ ជាមួយនឹងសីតុណ្ហភាពពេលយប់ទាបខ្លាំង។

ក្រុមហាម៉ាស បានអំពាវនាវម្តងហើយម្តងទៀតឱ្យចាប់ផ្តើមការចរចាជាបន្ទាន់លើដំណាក់កាលទី២ នៃបទឈប់បាញ់ ដែលសម្របសម្រួលដោយអាមេរិក កាតា និងអេហ្ស៊ីប ក្នុងបំណងបញ្ចប់សង្រ្គាមជាអចិន្ត្រៃយ៍។ អ៊ីស្រាអែលនិយាយថា ខ្លួនពេញចិត្តក្នុងការបន្តដំណាក់កាលទី១ រហូតដល់ពាក់កណ្តាលខែមេសា ហើយការបញ្ឈប់ជំនួយដល់តំបន់ហ្កាហ្សា ដោយសារតែភាពជាប់គាំងលើរឿងនេះ៕