ប្រធានាធិបតីស្តីទីរបស់កូរ៉េខាងត្បូង កំពុងស្វែងរកដំណោះស្រាយជាមួយសហរដ្ឋអាមេរិក ចំពោះការយល់ច្រឡំណាមួយ ជុំវិញពន្ធគយ បន្ទាប់ពីប្រធានាធិបតីអាមេរិកលោក Donald Trump ថ្មីៗនេះ បានជ្រើសរើសកូរ៉េខាងត្បូង សម្រាប់ការអនុវត្តពន្ធខ្ពស់។

កាលពីសប្តាហ៍មុន អំឡុងសុន្ទរកថាទៅកាន់សភាអាមេរិក លោក Trump ដែលបានប្រាប់ក្រុមសេដ្ឋកិច្ចរបស់លោកឲ្យរៀបចំផែនការពន្ធបិដិការ (ការដាក់ពន្ធតបតវិញ) នៅដើមខែមេសា បានលើកឡើងថា ពន្ធជាមធ្យមរបស់កូរ៉េខាងត្បូង គឺខ្ពស់ជាងសហរដ្ឋអាមេរិក ៤ដង បើទោះបីជាយោធា និងជំនួយផ្សេងទៀត ត្រូវបានទីក្រុងវ៉ាស៊ីនតោន ផ្តល់ដល់សម្ព័ន្ធមិត្តអាស៊ីក៏ដោយ។

ក្រសួងហិរញ្ញវត្ថុបានឲ្យដឹងនៅក្នុងសេចក្តីថ្លែងការណ៍មួយថា៖ «ប្រធានាធិបតីស្តីទី លោក Choi Sang-mok បានបញ្ជាឲ្យពន្យល់យ៉ាងច្បាស់លាស់ និងហ្មត់ចត់ដល់សហរដ្ឋអាមេរិក អំពីការយល់ច្រឡំណាមួយនៃអត្រាពន្ធរបស់យើងលើការនាំចូលរបស់សហរដ្ឋអាមេរិក»។

គួរបញ្ជាក់ថា ប្រទេសកូរ៉េខាងត្បូងដាក់អត្រាពន្ធខ្ពស់បំផុតទី២ ក្នុងចំណោមដៃគូពាណិជ្ជកម្មធំៗជាងគេទាំង១៥ របស់សហរដ្ឋអាមេរិក បន្ទាប់ពីប្រទេសឥណ្ឌា។ តែទោះជាយ៉ាងនេះក្ដី ចំពោះការនាំចូលរបស់សហរដ្ឋអាមេរិក ពន្ធគយស្ទើរតែទាំងអស់ត្រូវបានលុបចោលក្រោមកិច្ចព្រមព្រៀងពាណិជ្ជកម្មសេរីរបស់ប្រទេសទាំង២ ដែលបានចុះហត្ថលេខាលើកដំបូងក្នុងឆ្នាំ២០១៧ និងបានកែសម្រួលនៅឆ្នាំ២០១៨ អំឡុងអាណត្តិដំបូងរបស់លោក Trump៕