រដ្ឋមន្ត្រីការបរទេសអាមេរិក លោក Marco Rubio បាននិយាយកាលពីថ្ងៃចន្ទ (១០ មីនា) ថា សហរដ្ឋអាមេរិក ជំទាស់នឹងភាសាខឹងសម្បារណាមួយ ដែលអាចប៉ះពាល់ដល់កិច្ចខិតខំប្រឹងប្រែងរបស់ខ្លួនក្នុងការនាំយករុស្ស៊ី និងអ៊ុយក្រែន ទៅកាន់តុចរចាសន្តិភាព ខណៈទីក្រុងវ៉ាស៊ីនតោន ប្រកាន់ជំហរតឹងជាមួយក្រុម G7 នៅមុនកិច្ចប្រជុំនៅសប្តាហ៍នេះ ដោយធ្វើឱ្យសម្ព័ន្ធមិត្តទាំងនេះកាន់តែព្រួយបារម្ភពីការខ្វែងគំនិតគ្នាថែមទៀត។

បណ្ដារដ្ឋមន្ត្រីការបរទេសនៃក្រុមប្រទេសប្រជាធិបតេយ្យធំៗចំនួន៧ គឺចក្រភពអង់គ្លេស កាណាដា បារាំង អាល្លឺម៉ង់ អ៊ីតាលី ជប៉ុន និងសហរដ្ឋអាមេរិក ឬហៅថា G7 នឹងជួបប្រជុំគ្នានៅរមណីយដ្ឋានមាត់ទន្លេ La Malbaie ខេត្តកេប៊ិក របស់កាណាដា នៅថ្ងៃទី ១២-១៤ ខែមីនា ខាងមុខ ដែលជាលើកដំបូងហើយតាំងពីលោកប្រធានាធិបតីអាមេរិក Donald Trump ត្រលប់ចូលកាន់អំណាចវិញក្នុងខែមករា។

គួរឱ្យដឹងថា កិច្ចប្រជុំ G7 តែងឯកភាពគ្នារហូតមក ចាប់តាំងពីសមាជិកភាពរបស់រុស្ស៊ី ត្រូវបានផ្អាកក្នុងខែមីនា ឆ្នាំ២០១៤ ព្រោះតែការដាក់បញ្ចូលឧបទ្វីបគ្រីមេ ដែលបញ្ជាក់ពីការគាំទ្រដ៏ខ្ជាប់ខ្ជួនរបស់ពួកគេសម្រាប់អ៊ុយក្រែន ប៉ុន្តែពេលនេះ លោក Trump បានបំបែកការរួបរួមដែកថែបរបស់លោកខាងលិច ដោយទាញអាមេរិក ឱ្យខិតទៅជិតទីក្រុងមូស្គូ ខណៈកំពុងបង្កើនការរិះគន់លើទីក្រុងគីវ។

យោងតាមក្រុមអ្នកការទូត G7 បានឱ្យដឹងថា កាណាដាដំបូងឡើយសង្ឃឹមថា G7 នឹងព្រមព្រៀងគ្នាលើសេចក្តីថ្លែងការណ៍រួមមួយ រាប់ចាប់ពីសង្រ្គាមនៅអ៊ុយក្រែន រហូតដល់មជ្ឈិមបូព៌ា និងចិន ហើយនិងសេចក្តីប្រកាសទីពីរ ប៉ុន្តែការព្រមព្រៀងនៅពេលនេះអាចលំបាកខ្លាំង ដោយអ្នកខ្លះខ្លាចថា ការសម្របសម្រួលប្រហែលមិនអាចកើតមាន។ ប្រភពការទូតបន្ថែមថា អាមេរិក ចង់ដកឯកសារយោងនៃការដាក់ទណ្ឌកម្ម និងសង្គ្រាមរបស់រុស្ស៊ី នៅអ៊ុយក្រែន ដើម្បីកុំឱ្យមានភាពរកាំរកូសបន្ថែមជាមួយទីក្រុងមូស្គូ ដែលអាចបំផ្លាញកិច្ចខិតខំសន្តិភាពអ៊ុយក្រែន៕