ហ្វូងអ្នកគាំទ្ររបស់អតីតប្រធានាធិបតីហ្វីលីពីន លោក Rodrigo Duterte បានប្រមូលផ្តុំគ្នាតវ៉ាយ៉ាងច្រើនកុះករនៅខាងក្រៅមូលដ្ឋានទ័ពអាកាស ជាទីដែលអតីតមេដឹកនំារូបនេះកំពុងត្រូវបានឃុំខ្លួននៅថ្ងៃអង្គារ (១១ មីនា) នេះ បន្ទាប់ពីលោកត្រូវបានចាប់ខ្លួនក្រោមដីការបស់តុលាការព្រហ្មទណ្ឌអន្តរជាតិ (ICC) ជុំវិញបទចោទឧក្រិដ្ឋកម្មប្រឆាំងមនុស្សជាតិ។

អាជ្ញាធរបានបង្កើនសន្តិសុខយ៉ាងខ្លាំង ដោយមាននគរបាលរាប់សិបនាក់យាមនៅមូលដ្ឋានទ័ពអាកាស Villamor ខណៈក្រុមអ្នកគាំទ្ររបស់លោក Duterte បានប្រមូលផ្តុំគ្នាបាតុកម្ម និងស្រែកពាក្យតវ៉ាប្រឆាំងនឹងការចាប់ខ្លួននោះ។

ការិយាល័យរបស់លោកប្រធានាធិបតី Ferdinand Marcos Jr បាននិយាយនៅក្នុងសេចក្តីថ្លែងការណ៍មួយនៅពីថ្ងៃអង្គារថា លោក Duterte រងដីកាចាប់ខ្លួនរបស់នគរបាលអាំងទែប៉ូ Interpol នៅពេលលោកទៅដល់អាកាសយានដ្ឋានសំខាន់របស់ទីក្រុងម៉ានីល ហើយកំពុងស្ថិតក្នុងការឃុំឃាំង។

ការចាប់ខ្លួននេះធ្វើឡើងបន្ទាប់ពីលោក Duterte បានរិះគន់ ICC ជាច្រើនឆ្នាំមកហើយ ចាប់តាំងពីលោកបានដកហ្វីលីពីនជាឯកតោភាគីចេញពីសន្ធិសញ្ញាទីក្រុងរ៉ូម របស់តុលាការពិភពលោកមួយនេះក្នុងឆ្នាំ២០១៩ ខណៈ ICC បានចាប់ផ្តើមពិនិត្យមើលការចោទប្រកាន់ ជុំវិញការសម្លាប់ក្រៅប្រព័ន្ធតុលាការទ្រង់ទ្រាយធំក្នុងការបង្រ្កាបគ្រឿងញៀន៕