ប្រធានាធិបតីបណ្តោះអាសន្នរបស់ស៊ីរីលោក Ahmed al-Sharaa បានបញ្ជាក់នៅក្នុងបទសម្ភាសន៍ជាមួយទីភ្នាក់ងារសារព័ត៌មានរ៉យទ័រ អំពីព័ត៌មានពីការស្លាប់សមាជិកកងកម្លាំងសន្តិសុខចំនួន ២០០ នាក់ នៅក្នុងការប៉ះទង្គិចគ្នា ជាមួយអ្នកគាំទ្រប្រដាប់អាវុធរបស់អតីតមេដឹកនាំស៊ីរី លោក បាសា អាល់អា     សាដ   ( Bashar Assad) នៅភាគខាងលិចនៃប្រទេសនេះ។

យោងតាមទីភ្នាក់ងារសារព័ត៌មាននេះ លោក al-Sharaa បាននិយាយថា សមាជិកនៃកងកម្លាំងសន្តិសុខចំនួន ២០០នាក់ ត្រូវបានសម្លាប់ នៅក្នុងភាពចលាចល ខណៈដែលបដិសេធមិននិយាយអំពីចំនួនអ្នកស្លាប់សរុប ដែលកំពុងរង់ចាំការស៊ើបអង្កេត ដែលនឹងធ្វើឡើងដោយគណៈកម្មាធិការឯករាជ្យមួយ»។ កាលពីថ្ងៃអាទិត្យ លោកប្រធានាធិបតី បានបង្កើតគណៈកម្មាធិការឯករាជ្យមួយ ដែលមានសមាជិកចំនួន ៧រូប ដើម្បីស្វែងរកមូលហេតុនៃការកើនឡើងនៃអំពើហិង្សា នៅក្នុងខេត្តជាប់មាត់សមុទ្រ ស៊ើបអង្កេតឧក្រិដ្ឋកម្ម និងនាំខ្លួនអ្នកទទួលខុសត្រូវ មកកាត់ទោស។

មេដឹកនាំស៊ីរីរូបនេះ បានសន្យាថា អ្នកទាំងអស់ដែលជាប់ពាក់ព័ន្ធក្នុងឧក្រិដ្ឋកម្ម ដែលបានប្រព្រឹត្តក្នុងអំឡុងពេលថ្ងៃនៃការប៉ះទង្គិចគ្នាប្រឆាំងនឹងជនស៊ីវិល ដែលភាគច្រើនរស់នៅក្នុងសហគមន៍ជនភាគតិច អាឡាវីត(Alawite) នឹងត្រូវបានផ្តន្ទាទោស។ 

សារព័ត៌មានរ៉យទ័រ បានដកស្រង់សម្តីលោកប្រធានាធិបតី ដែលបាននិយាយថា៖«ប្រទេសស៊ីរី គឺជានីតិ   រដ្ឋ។ ច្បាប់នឹងដាក់ទោសដូចគ្នាចំពោះអ្នកប្រព្រឹត្តបទល្មើស»។ លោក al-Sharaa បានសង្កត់ធ្ងន់ថា៖   «យើងបានប្រយុទ្ធ ដើម្បីការពារអ្នកដែលត្រូវបានគេជិះជាន់ ហើយយើងនឹងមិនទទួលយកការបង្ហូរឈាមណាមួយ ដោយអយុត្តិធម៌ ឬដោយគ្មានការដាក់ទណ្ឌកម្ម ឬការទទួលខុសត្រូវឡើយ ទោះបីក្នុងចំណោមអ្នកដែលជិតស្និទ្ធបំផុតជាមួយយើង ក៏ដោយ»។