រដ្ឋមន្ត្រីការបរទេសប៉ូឡូញ លោក Radoslaw Sikorski បាននិយាយនៅថ្ងៃពុធនេះថា ការផ្តល់ជំនួយយោធារបស់សហរដ្ឋអាមេរិក ទៅកាន់ប្រទេសជិតខាងអ៊ុយក្រែន តាមរយៈប្រទេសប៉ូឡូញ បានបន្តដល់កម្រិតមុន បន្ទាប់ពីកិច្ចចរចារវាងសហរដ្ឋអាមេរិក និងអ៊ុយក្រែន នៅក្នុងប្រទេសអារ៉ាប៊ីសាអ៊ូឌីត។

កាលពីសប្តាហ៍មុន ទីក្រុងវ៉ាស៊ីនតោន បានផ្អាកជំនួយយោធាដល់ប្រទេសអ៊ុយក្រែនដែលហែកហួរដោយសង្រ្គាម បន្ទាប់ពីការប៉ះទង្គិចគ្នាជាសាធារណៈនៅក្នុងសេតវិមានរវាងប្រធានាធិបតីអាមេរិក លោក ដូណាល់ ត្រាំ ( Donald Trump) និងសមភាគីអ៊ុយក្រែនលោក វ្ល៉ូឌីមី ហ្សេឡិនស្គី (Volodymyr Zelensky)។

ប៉ុន្តែនៅក្នុងកិច្ចពិភាក្សានៅទីក្រុង Jeddah កាលពីថ្ងៃអង្គារ អ៊ុយក្រែនបានយល់ព្រមលើសំណើរបស់អាមេរិកសម្រាប់បទឈប់បាញ់រយៈពេល ៣០ ថ្ងៃ ជាមួយទីក្រុងមូស្គូ ហើយបានយល់ព្រមលើការចរចា   ភ្លាមៗ ជាមួយរុស្ស៊ី ដែលជំរុញឲ្យលោក ត្រាំ លុបចោលការបង្កកជំនួយនោះ។

រដ្ឋមន្ត្រីការបរទេសប៉ូឡូញលោក Sikorski បានប្រាប់អ្នកយកព័ត៌មាននៅថ្ងៃពុធនេះថា៖«ខ្ញុំបញ្ជាក់ថា ការបញ្ជូនសព្វាវុធតាមរយៈមជ្ឈមណ្ឌល Jasionka (មជ្ឈមណ្ឌលដឹកជញ្ជូន) បានត្រឡប់ទៅកម្រិតមុនវិញ» ។

សហរដ្ឋអាមេរិក និងសហភាពអឺរ៉ុប គឺជាអ្នកផ្គត់ផ្គង់អាវុធឈានមុខគេ ដល់អ៊ុយក្រែន។