ជួររថយន្តដ៏វែង បាននិងកំពុងបង្កើតនៅស្ថានីយ៍ប្រេងឥន្ធនៈ នៅទូទាំងប្រទេសបូលីវី ក្នុងសប្តាហ៍នេះ ខណៈប្រជាជនព្យាយាមដើម្បីទទួលបានប្រេងឥន្ធនៈ ក្នុងពេលមានការកង្វះខ្លាំង។

រូបភាពរបស់សារព័ត៌មាន Reuters បានថតរូបភាពរថយន្ត និងរថយន្តដឹកទំនិញតម្រៀបជួរ នៅទីក្រុង Santa Cruz ជាមជ្ឈមណ្ឌលសេដ្ឋកិច្ចភាគខាងកើតរបស់ប្រទេសបូលីវី។ ប្រជាជន បាននិយាយថា ពួកគេបានរង់ចាំរយៈពេលច្រើនម៉ោងដើម្បីចាក់ប្រេង។

អ្នកបើកបររថយន្តដឹកទំនិញម្នាក់និយាយថា លោកមានការខកចិត្តចំពោះការពន្យារពេល ដែលបានមកតម្រង់ជួរតាំងពីពេលយប់។ ក្រសួងថាមពលរបស់ប្រទេសបូលីវី បានប្រកាសកញ្ចប់លើកទឹកចិត្ត ដែលត្រូវបានរៀបចំដើម្បីជំរុញការនាំចូលប្រេងសាំង និងប្រេងម៉ាស៊ូត។ ចំណាត់ការនេះ មានគោលបំណងធ្វើឱ្យទីផ្សារថាមពលឯកជនរបស់ប្រទេស មានដំណើរការឡើងវិញ។

យោងតាមសេចក្តីថ្លែងការណ៍របស់ក្រសួងបានឲ្យដឹងថា ការជំរុញទឹកចិត្តរួមមានការពន្លឿនការអនុម័តលិខិតអនុញ្ញាតនាំចូល និងកាត់បន្ថយពន្ធ លើការផ្គត់ផ្គង់ប្រេងឥន្ធនៈដែលនាំចូល។