ប្រធានាធិបតីបណ្តោះអាសន្នរបស់ប្រទេសស៊ីរី លោក Ahmed al-Sharaa បានចេញក្រឹត្យប្រធានាធិបតីមួយកាលពីថ្ងៃពុធ ដើម្បីបង្កើតក្រុមប្រឹក្សាសន្តិសុខជាតិ ក្នុងគោលបំណងពង្រឹងការសម្របសម្រួលសន្តិសុខ និងស្ថិរភាពនយោបាយ ក្នុងដំណាក់កាលអន្តរកាលរបស់ប្រទេសនេះ។

ក្រឹត្យរបស់ប្រធានាធិបតី បានគូសបញ្ជាក់ថា ក្រុមប្រឹក្សាដែលទើបបង្កើតថ្មី នឹងទទួលខុសត្រូវក្នុងការសម្របសម្រួលគោលនយោបាយសន្តិសុខជាតិ និងដោះស្រាយបញ្ហាប្រឈមផ្នែកសន្តិសុខ និង នយោបាយ ដែលប្រទេសស៊ីរីកំពុងជួបប្រទះ។

ដោយត្រូវបានដឹកនាំដោយប្រធានាធិបតី សមាជិកភាពរបស់ក្រុមប្រឹក្សាសន្តិសុខជាតិ រួមមានរដ្ឋមន្ត្រីការបរទេស ការពារជាតិ មហាផ្ទៃ និងប្រធានស៊ើបការណ៍ទូទៅរបស់ប្រទេសស៊ីរី។

លើសពីនេះទៅទៀតនោះ មុខតំណែងទីប្រឹក្សាចំនួនពីរ ត្រូវបានរៀបចំសម្រាប់សមាជិក ដែលត្រូវបានតែងតាំងដោយប្រធានាធិបតី ដោយផ្អែកលើបទពិសោធ និងជំនាញ។ ទីប្រឹក្សាបច្ចេកទេសដែលមានជំនាញផ្នែកបច្ចេកទេស និងវិទ្យាសាស្ត្រ ក៏នឹងចូលរួមផងដែរ។

ក្រុមប្រឹក្សានេះ ត្រូវបានកំណត់ឲ្យកោះប្រជុំយ៉ាងទៀងទាត់ ឬតាមការស្នើសុំរបស់ប្រធានាធិបតី ដោយការសម្រេចចិត្ត ត្រូវបានធ្វើឡើងជាសមូហភាព ក្នុងចំណោមសមាជិករបស់ខ្លួន។

ក្រឹត្យនេះ បានសង្កត់ធ្ងន់ថា ការទទួលខុសត្រូវរបស់ក្រុមប្រឹក្សាសន្តិសុខជាតិ នឹងស្របតាមផលប្រយោជន៍ជាតិសំខាន់ៗ របស់ប្រទេសស៊ីរី ដោយបានធានានូវការសម្របសម្រួលប្រកបដោយប្រសិទ្ធភាព ក្នុងចំណោមស្ថាប័នរដ្ឋផ្សេងៗ។