បាល់ទាត់៖ ពេលនេះក្លិបបាល់ទាត់ឬទ្ធីសែនកំពុងខិតខំហ្វឹកហាត់ជារៀងរាល់ថ្ងៃ ដើម្បីចូលរួមប្រកួតដណ្តើមពានជម្រើសជើងឯកកម្ពុជាលីគ២ ឆ្នាំ២០២១ ដែលនឹងចាប់ផ្តើមនៅថ្ងៃទី២៧ ខែវិច្ឆិកា ឆ្នាំ២០២១ តទៅដោយបើកការប្រកួតជាមួយក្រុមយុវជនសាលាបាល់ទាត់ជាតិ។
លោក សាន់ យូ ប្រធានក្លិបបានឱ្យដឹងថា ក្លឹបកីឡាបាល់ទាត់ឬទ្ធីសែនទើបនឹងចាប់ផ្ដើមសារជាថ្មីនៅក្នុងឆ្នាំ២០២០ នេះទេ ហើយកន្លងមកក្លឹបឬទ្ធីសែនបានបាត់មុខពីការប្រកួតមួយរយៈធំ ដោយសារកត្តាកង្វះខាតផ្នែកហិរញ្ញវត្ថុ គ្រូជំនាញ រួមនឹងការខ្វះខាតកីឡាករផងដែរ។ ក៏ប៉ុន្តែក្លឹបឬទ្ធីសែននាពេលបច្ចុប្បន្នមិនដូចពេលមុននោះឡើយ ដោយសារតែក្លឹបមានឯកឧត្ដម ស៊ុន សុវណ្ណារិទ្ធិ អភិបាលខេត្តកំពង់ឆ្នាំងជាអ្នកគាំទ្រពេញទំហឹង ដើម្បីក្លឹបបាល់ទាត់ឬទ្ធីសែនមានមុខមាត់សារជាថ្មីនៅក្នុងប្រទេស។ ម្យ៉ាងវិញទៀតក្លឹបឬទ្ធីសែននាពេលនេះគឺមានកីឡាករល្អៗ ដែលបានជ្រើសរើសមកពីតាមបណ្ដាខេត្តនានាមកលេងអោយក្លឹប រួមនឹងគ្រូបង្វឹកមានបទពិសោធន៍។ មុនការប្រកួតចូលមកដល់ ក្លិបឬទ្ធីសែនបានត្រៀមលក្ខណៈ ដោយបានប្រកួតឈ្នះយុវជនកងយោធពលខេមរភូមិន្ទ និងចាញ់ក្រុមយុវជនភ្នំពេញក្រោន។ រដូវកាល២០២០ ឬទ្ធីសែនបញ្ចប់ត្រឹមចំណាត់ថ្នាក់លេខ៧ មាន ១០ពិន្ទុក្រោយលេងបាន ៩ប្រកួត៕
អត្ថបទ៖ គង់ ហួន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
