នាយករដ្ឋមន្ត្រី លោក Keir Starmer បានប្រកាសថា «ជម្រើសទាំងអស់ កំពុងត្រូវបានពិភាក្សា» នៅពេលនិយាយអំពីការឆ្លើយតបទៅនឹងការដំឡើងពន្ធជុំចុងក្រោយរបស់ប្រធានាធិបតីអាមេរិក Donald Trump ដែលប៉ះពាល់ដល់អាជីវកម្មអង់គ្លេស។

ចក្រភពអង់គ្លេសក៏ត្រូវបានធ្លាក់ចូលទៅក្នុងសង្រ្គាមពាណិជ្ជកម្មដែរ បន្ទាប់ពីរដ្ឋបាលរបស់លោក Trump បានអនុវត្តការដំឡើងពន្ធ ២៥ភាគរយ ចំពោះការនាំចូលពីឧស្សាហកម្មដែក និងអាលុយមីញ៉ូមទូទាំងពិភពលោក។

ក្នុងកម្មវិធីឆ្លើយសំណួររបស់នាយករដ្ឋមន្ត្រី មេដឹកនាំគណបក្សប្រជាធិបតេយ្យសេរី លោក Sir Ed Davey បានជំរុញឲ្យលោក Starmer «មានជំហររឹងមាំបន្ថែមទៀត» ជាមួយសហរដ្ឋអាមេរិក ហើយធ្វើដំណើរទៅទស្សនកិច្ច នៅប្រទេសកាណាដា «ឲ្យបានឆាប់តាមដែលអាចធ្វើបាន» ដើម្បីបង្ហាញពីសាមគ្គីភាព បន្ទាប់ពីការដំឡើងពន្ធនាំចូលជាច្រើន ត្រូវបានដាក់លើប្រទេសនេះ។

ជាការឆ្លើយតប លោក Starmer បានប្រាប់ថា៖ «ពាក់ព័ន្ធនឹងបញ្ហានៃការដំឡើងពន្ធ មិនខុសពីអ្នកផ្សេងទៀតនោះទេ ខ្ញុំមានការខកចិត្តដែលបានឃើញការដំឡើងពន្ធជាសកល ទាក់ទងនឹងដែកថែប និងអាលុយមីញ៉ូម។ ប៉ុន្តែយើងនឹងប្រកាន់យកនូវវិធីសាស្រ្តជាក់ស្តែង។ ដូចដែលលោកបានដឹងហើយ យើងកំពុងស្ថិតក្នុងដំណាក់កាលចរចារ ដើម្បីឲ្យមានកិច្ចព្រមព្រៀងសេដ្ឋកិច្ចដែលគ្របដណ្តប់លើវិស័យជាច្រើន ហើយនឹងរួមបញ្ចូលបញ្ហាពន្ធផងដែរ ប្រសិនបើយើងជោគជ័យ ប៉ុន្តែយើងនឹងបន្តពិភាក្សាគ្រប់ជម្រើស»។

នេះគឺជាសញ្ញាដំបូង ដែលបង្ហាញថា រដ្ឋាភិបាលអង់គ្លេស កំពុងបើកចំហទ្វារ សម្រាប់លទ្ធភាពនៃការមានវិធានការសងសឹក បន្ទាប់ពីលោក Donald Trump បានផ្ដល់ផលប៉ះពាល់ដល់ការនាំចូលដែកថែប និងអាលុយមីញ៉ូម ដោយដំឡើងពន្ធ ២៥ភាគរយ៕