តាមរយៈរបាយការណ៍ថ្មីមួយ ដែលចេញផ្សាយនាថ្ងៃព្រហស្បតិ៍ (ទី១៣ ខែមីនា) នេះ អ្នកជំនាញរបស់អង្គការសហប្រជាជាតិ (UN) បានលើកឡើងថា អ៊ីស្រាអែលបានប្រព្រឹត្ត «អំពើប្រល័យពូជសាសន៍» លើពលរដ្ឋប៉ាឡេស្ទីន ដោយបានបំផ្លាញជាប្រព័ន្ធនូវកន្លែងថែទាំសុខភាពរបស់ស្ត្រី ក្នុងអំឡុងពេលមានជម្លោះ នៅតំបន់ហ្កាហ្សា និងបានប្រើប្រាស់អំពើហិង្សាផ្លូវភេទជាយុទ្ធសាស្ត្រសង្គ្រាម។

បេសកកម្មអចិន្ត្រៃយ៍របស់អ៊ីស្រាអែល ប្រចាំនៅ UN ក្នុងទីក្រុងហ្សឺណែវ ប្រទេសស្វីស បានពណ៌នាការចោទប្រកាន់នៅក្នុងរបាយការណ៍នេះថា គ្មានមូលដ្ឋាន លម្អៀង និងខ្វះភាពគួរឲ្យជឿជាក់បាន។

គណៈកម្មការស៊ើបអង្កេតអន្តរជាតិឯករាជ្យរបស់ UN លើដែនដីកាន់កាប់ប៉ាឡេស្ទីន ដែលរួមមានទីក្រុងហ្សេរុយសាឡិមខាងកើត និងអ៊ីស្រាអែល បានប្រាប់ឲ្យដឹងថា៖ «អាជ្ញាធរអ៊ីស្រាអែលបានបំផ្លាញផ្នែកនៃសមត្ថភាពបន្តពូជរបស់ជនជាតិប៉ាឡេស្ទីន នៅតំបន់ហ្កាហ្សា ជាក្រុម ក្នុងនោះរួមទាំងការដាក់វិធានការដែលមានគោលបំណងការពារការបង្កកំណើត ជាប្រភេទមួយ ក្នុងចំណោមទម្រង់នៃអំពើប្រល័យពូជសាសន៍ដែលមានចែងនៅក្នុងលក្ខន្តិកទីក្រុងរ៉ូម និងអនុសញ្ញាប្រល័យពូជសាសន៍»។

គណៈកម្មាការបានឲ្យដឹងទៀតថា ដោយបន្ថែមពីលើការកើនឡើងនៃមរណភាពមាតា ដោយសារការរឹតត្បិត ក្នុងការទទួលបានការផ្គត់ផ្គង់ផ្នែកវេជ្ជសាស្រ្ត សកម្មភាពទាំងនោះស្មើនឹងឧក្រិដ្ឋកម្ម ប្រឆាំងមនុស្សជាតិ ដោយសារការសម្លាប់រង្គាល។

របាយការណ៍នេះ បានចោទប្រកាន់កងកម្លាំងសន្តិសុខរបស់អ៊ីស្រាអែលថា បានប្រើប្រាស់ការសម្រាតសម្លៀកបំពាក់ជាសាធារណៈ ដោយបង្ខំ និងការរំលោភបំពានផ្លូវភេទ ដែលជាផ្នែកមួយនៃនីតិវិធីប្រតិបត្តិការស្តង់ដាររបស់ពួកគេ ដើម្បីដាក់ទណ្ឌកម្មប្រជាជនប៉ាឡេស្ទីន បន្ទាប់ពីមានការវាយប្រហារដឹកនាំដោយក្រុមហាម៉ាស នៅភាគខាងត្បូងអ៊ីស្រាអែល កាលពីខែតុលា ឆ្នាំ២០២៣។ អ៊ីស្រាអែលបានច្រានចោលការចោទប្រកាន់នេះ៕