ប្រជាជនអ៊ុយក្រែន និងរុស្ស៊ី នៅតែមានចិត្តងឿងឆ្ងល់ និងសង្ស័យនៅថ្ងៃព្រហស្បតិ៍ (១៣ មីនា) សប្ដាហ៍នេះ ទៅលើសំណើបទឈប់បាញ់ដែលអាមេរិកបានស្នើឡើង បន្ទាប់ពីសេចក្តីថ្លែងការណ៍របស់លោក Vladimir Putin ដែលថា រុស្ស៊ីគាំទ្រសំណើរបស់ទីក្រុងវ៉ាស៊ីនតោន សម្រាប់បទឈប់បាញ់នៅអ៊ុយក្រែន ប៉ុន្តែត្រូវធ្វើការបន្ថែមទៀតលើសេចក្ដីលម្អិត។

ពេលវេលានៃសំណើបទឈប់បាញ់នេះកើតឡើងមួយថ្ងៃប៉ុណ្ណោះបន្ទាប់ពីការវាយប្រហារយានដ្រូនដ៏ធំបំផុតមួយតបតគ្នា រវាងរុស្ស៊ី និងអ៊ុយក្រែន ដែលបានធ្វើឱ្យអ្នកស្រុកមិនសូវទុកចិត្តពីភាពស្មោះត្រង់រវាងភាគីទាំងពីរ លើផែនការបទឈប់បាញ់។ ទោះបីជាមានការខកចិត្តយ៉ាងណាក្ដី ក៏ប្រជាពលរដ្ឋទាំងសងខាងសង្ឃឹមថា សន្តិភាពអាចសម្រេចបាន។

លោក Putin បានលើកឡើងកាលពីថ្ងៃព្រហស្បតិ៍ថា រុស្ស៊ីបានយល់ព្រមជាមួយសំណើអាមេរិក ដើម្បីបញ្ឈប់ការប្រយុទ្ធ ប៉ុន្តែថា បទឈប់បាញ់ណាមួយគួរតែនាំទៅរកសន្តិភាពយូរអង្វែង ហើយនឹងត្រូវដោះស្រាយរឹសគល់នៃជម្លោះ ខណៈព័ត៌មានលម្អិតសំខាន់ៗជាច្រើន ចាំបាច់ត្រូវកែតម្រូវឡើងវិញ។

ប្រធានាធិបតីអាមេរិក លោក Donald Trump បានសម្ដែងក្ដីសង្ឃឹមថា វិមានក្រឹមឡាំងនឹងយល់ព្រមចំពោះសំណើរបស់អាមេរិក សម្រាប់បទឈប់បាញ់ ៣០ថ្ងៃ ដែលអ៊ុយក្រែនបានគាំទ្ររួចទៅហើយដើម្បីបញ្ចប់អ្វីដែលលោក Trump ហៅថា "ការបង្ហូរឈាម"៕