ចៅក្រមសហព័ន្ធនៅរដ្ឋ California និងរដ្ឋ Maryland កាលពីថ្ងៃព្រហស្បតិ៍ (១៣ មីនា) បានចេញដីកាបង្គាប់ឱ្យរដ្ឋបាលរបស់លោកប្រធានាធិបតីអាមេរិក Donald Trump ប្រគល់តំណែងទៅឱ្យបុគ្គលិកសហព័ន្ធរាប់ម៉ឺននាក់ ដែលបាត់បង់ការងារធ្វើឡើងវិញ។

សេចក្ដីសម្រេចនេះជាការវាយប្រហារយ៉ាងធំទៅលើកិច្ចខិតខំប្រឹងប្រែងរបស់លោក Trump និងទីប្រឹក្សាមហាសេដ្ឋីរបស់ខ្លួន គឺលោក Elon Musk ក្នុងការបង្រួមការិយាធិបតេយ្យសហព័ន្ធ។ គួរឱ្យដឹងថា ទីភ្នាក់ងាររដ្ឋាភិបាលប្រឈមនឹងកាលបរិច្ឆេទផុតកំណត់នៅថ្ងៃព្រហស្បតិ៍ ១៣ មីនា ដើម្បីដាក់ផែនការរបស់ខ្លួនសម្រាប់រលកទីពីរនៃការបញ្ឈប់បុគ្គលិក និងកាត់បន្ថយថវិការបស់ពួកគេ។

ចៅក្រមតំបន់អាមេរិក James Bredar នៅទីក្រុង Baltimore បានយល់ស្របជាមួយរដ្ឋចំនួន២០ ដែលដឹកនាំដោយអ្នកប្រជាធិបតេយ្យថា ភ្នាក់ងារចំនួន១៨ ដែលបានបណ្តេញនិយោជិតជាច្រើនចេញក្នុងប៉ុន្មានសប្តាហ៍ថ្មីៗនេះ បានរំលោភលើបទប្បញ្ញត្តិដែលគ្រប់គ្រងការបញ្ឈប់បុគ្គលិកសហព័ន្ធ ដូច្នេះបុគ្គលិកដែលត្រូវបានបញ្ឈប់ ត្រូវតែឱ្យត្រឡប់ទៅកាន់តំណែងរបស់ពួកគេវិញ។

សេចក្ដីសម្រេចនេះ បានកើតឡើងប៉ុន្មានម៉ោងប៉ុណ្ណោះ បន្ទាប់ពីចៅក្រមអាមេរិកមួយរូបទៀតក្នុងទីក្រុង San Francisco បានបញ្ជាឱ្យទីភ្នាក់ងារប្រគល់តំណែងឱ្យបុគ្គលិកដែលត្រូវបានបញ្ឈប់ឡើងវិញ។ អ្នកនាំពាក្យសេតវិមាន លោកស្រី Karoline Leavitt បាននិយាយនៅក្នុងសេចក្តីថ្លែងការណ៍មួយថា ចៅក្រមខ្វះអំណាចក្នុងការចេញសេចក្តីសម្រេចបែបនេះ ហើយថារដ្ឋបាលនឹង "វាយបកវិញភ្លាមៗ"៕