ហ្វូងមនុស្សរាប់រយនាក់បានសម្រុកចូលយ៉ាងតានតឹងទៅក្នុងបន្ទប់ទទួលភ្ញៀវនៃអគារ Trump Tower ក្នុងទីក្រុងញូវយ៉ក សហរដ្ឋអាមេរិក កាលពីថ្ងៃព្រហស្បតិ៍ (១៣ មីនា) ដើម្បីតវ៉ាប្រឆាំងនឹងការចាប់ខ្លួន និងការឃុំខ្លួននិស្សិតសាកលវិទ្យាល័យ Columbia University ឈ្មោះ Mahmoud Khalil ដែលរដ្ឋបាលលោកប្រធានាធិបតី Donald Trump មានបំណងនិរទេស ជុំវិញសកម្មភាពគាំទ្រប៉ាឡេស្ទីនរបស់និស្សិតរូបនោះ។

ការចាប់ខ្លួននិស្សិត Khalil ពីទីក្រុងញូវយ៉ក ដែលកំពុងស្ថិតក្រោមការឃុំឃាំងផ្នែកអន្តោប្រវេសន៍ក្នុងរដ្ឋ Louisiana កាលពីថ្ងៃសៅរ៍ចុងសប្ដាហ៍មុន បានបង្កឱ្យមានការរិះគន់យ៉ាងទូលំទូលាយ និងការមិនពេញចិត្តជាច្រើន។

ក្រុមសំឡេងជ្វីហ្វដើម្បីសន្តិភាព បានប្រមូលផ្ដុំមនុស្សធ្វើបាតុកម្មថ្ងៃព្រហស្បតិ៍នោះ ដោយនិយាយថា ខ្លួនបាននាំមនុស្សជាង ៣០០នាក់សម្រុកចូល និងកំពុងកាន់កាប់អគារ Trump Tower ដើម្បីសម្ដែងការបដិសេធទ្រង់ទ្រាយធំរបស់ពួកគេ ជុំវិញការចាប់ខ្លួនបាតុករគាំទ្រប៉ាឡេស្ទីនរូបនោះ ខណៈបាតុករកាន់ស្លាកសញ្ញាតវ៉ា ដែលសរសេរថា "ប្រឆាំងពួកណាហ្ស៊ី មិនមែននិស្សិត" និង "សេរីភាពប៉ាឡេស្ទីន"។

នាយកដ្ឋាននគរបាលញូវយ៉កនិយាយថា ការតវ៉ាមានភាពតានតឹង ហើយមនុស្សជិត ១០០នាក់ត្រូវបានចាប់ខ្លួន។ អគារ Trump Tower ដែលមានទីតាំងនៅតំបន់ Manhattan គឺជាកន្លែងអង្គការលោក Trump និងជាទីដែលលោកប្រធានាធិបតី Trump និងស្រ្តីទីមួយ លោកស្រី Melania Trump មានវីឡាផេនហៅស៍ (Penthouse) នៅទីនោះ៕