អាជីវកម្មរបស់សហរដ្ឋអាមេរិក ដែលនាំចូល ចែកចាយ និងលក់រាយស្រាសំប៉ាញបារាំង និងស្រាក្រហមអ៊ីតាលី បានព្រមានថា ការគំរាមដំឡើងពន្ធ ២០០% របស់លោកប្រធានាធិបតីអាមេរិក Donald Trump លើគ្រឿងស្រវឹងអឺរ៉ុប នឹងធ្វើឱ្យពួកគេជួបការលំបាក ព្រមទាំងមានផលប៉ះពាល់ធ្ងន់ធ្ងរលើអ្នកគ្រប់គ្នា។

លោក Trump បានអះអាងថា ការដំឡើងពន្ធនោះនឹង "អស្ចារ្យសម្រាប់អាជីវកម្មស្រាក្រហម និងស្រាសំប៉ាញនៅអាមេរិក"។ ប៉ុន្តែទោះយ៉ាងនេះក្ដី អ្នកនាំចូល និងអ្នកចែកចាយស្រា ព្រមទាំងអ្នកលក់រាយ និងម្ចាស់ភោជនីយដ្ឋានពេលរាត្រី បានប្រាប់សារព៏ត៌មានរ៉យទ័រថា ពួកគេនឹងត្រូវបង់ថ្លៃខ្ពស់ជាងមុន ដែលនាំទៅដល់ផលអាក្រក់ទាំងម្ចាស់អាជីវកម្ម និងអតិថិជន។

នៅក្រោមច្បាប់របស់សហរដ្ឋអាមេរិក ក្រុមហ៊ុនផលិតគ្រឿងស្រវឹងមិនអាចលក់ដោយផ្ទាល់ទៅឱ្យអ្នកប្រើប្រាស់ បារកម្សាន្ត ឬភោជនីយដ្ឋានបានទេ ហើយផ្ទុយទៅវិញ អ្នកផលិតត្រូវតែលក់ទៅឱ្យអ្នកនាំចូល ឬអ្នកចែកចាយ ដែលលក់ផលិតផលនៅតាមទីតាំងទាំងនោះ។ នេះមានន័យថា ស្រាអ៊ឺរ៉ុបភាគច្រើនត្រូវបាននាំចូលដោយអ្នកនាំចូល និងចែកចាយរបស់អាមេរិកតូចៗប្រហែល ៤.០០០ស្ថាប័ន ដែលបន្ទុកពន្ធនឹងត្រូវទម្លាក់ទៅលើស្មាពួកគេ នេះបើតាមប្រធានសម្ព័ន្ធពាណិជ្ជកម្មស្រារបស់អាមេរិក ដែលតស៊ូមតិប្រឆាំងនឹងការយកពន្ធលើគ្រឿងស្រវឹង។

អាជីវករហាងស្រានៅទីក្រុងញូវយ៉ក បាននិយាយថា អាជីវកម្មអាមេរិកគឺជាអ្នកត្រូវបង់ពន្ធទាំងនេះ ហើយអាជីវកម្មអាមេរិកក៏ជាអ្នកត្រូវរងផលប៉ះពាល់ផងដែរ ប្រសិនបើអ្នកផ្គត់ផ្គង់ដំឡើងថ្លៃទំនិញដើម្បីរ៉ាប់រងការចំណាយ ហើយពួកគេបារម្ភថា អ្នកប្រើប្រាស់មិនទទួលយកតម្លៃខ្ពស់បែបនេះឡើយ៕