តុលាការព្រហ្មទណ្ឌអន្តរជាតិ ICC បាននិយាយកាលពីថ្ងៃព្រហស្បតិ៍ (១៣ មីនា) ថា អតីតមេដឹកនាំហ្វីលីពីន លោក Rodrigo Duterte នឹងបង្ហាញខ្លួនជាលើកដំបូងនៅសវនាការរបស់តុលាការ ICC នៅថ្ងៃសុក្រ (១៤ មីនា) នេះ នៅវេលាម៉ោង ១៣:០០ ម៉ោងសកល (GMT)។

លោក Duterte វ័យ ៧៩ឆ្នាំ បាននិយាយថា លោកបានត្រៀមខ្លួនរួចជាស្រេចដើម្បីទទួលខុសត្រូវគ្រប់បែបយ៉ាង ខណៈ ICC នាំរូបលោកទៅឃុំឃាំងដើម្បីប្រឈមមុខនឹងបទចោទឧក្រិដ្ឋកម្មប្រឆាំងមនុស្សជាតិ ជុំវិញសង្គ្រាមប្រឆាំងគ្រឿងញៀនរបស់លោក ដែលនៅក្នុងនោះ អ្នកប្រើប្រាស់ និងអ្នកជួញដូរគ្រឿងញៀនរាប់ពាន់នាក់ត្រូវបានសម្លាប់។

លោកអាចក្លាយជាអតីតប្រមុខរដ្ឋអាស៊ីដំបូងគេ ដែលទៅកាត់ទោសនៅទីនោះ។ ដីកាចាប់ខ្លួន ICC បានចោទប្រកាន់ថា ក្នុងនាមជាប្រធានាធិបតី លោក Duterte បានបង្កើត ផ្តល់មូលនិធិ និងបំពាក់អាវុធដល់ក្រុមមរណៈ ដែលធ្វើឃាតកម្មលើអ្នកប្រើប្រាស់ និងអ្នកចែកចាយគ្រឿងញៀនជាច្រើន។

លោក Duterte បានទទូចជាយូរមកហើយថា លោកបានណែនាំនគរបាលឱ្យតដៃតែក្នុងករណីដើម្បីការពារខ្លួនប៉ុណ្ណោះ ហើយតែងតែការពារការបង្រ្កាបនោះ ដោយប្រាប់អ្នកគាំទ្ររបស់លោកម្តងហើយម្តងទៀតថា លោកត្រៀមខ្លួនរួចជាស្រេចដើម្បី "ជាប់ពន្ធនាគារ" ប្រសិនបើរឿងនោះមានន័យថាអាចកម្ចាត់គ្រឿងញៀនខុសច្បាប់ចេញពីហ្វីលីពីនបាន៕