ប្រជាជនកាណាដាបាននិយាយថាពួកគេចង់ចូលរួមជាមួយសហភាពអឺរ៉ុប (EU) បន្ទាប់ពីមានការប៉ុនប៉ងរបស់លោក Donald Trump ដែលចង់ធ្វើឲ្យប្រទេសនេះក្លាយជា «រដ្ឋទី៥១ របស់សហរដ្ឋអាមេរិក»។

អ្នកនាំពាក្យរបស់ EU បាននិយាយថា ប្លុកពេញចិត្តនឹងការចាប់អារម្មណ៍នេះ ប៉ុន្តែបានចង្អុលបង្ហាញថា ការក្លាយជាប្រទេសអឺរ៉ុប គឺជាចំណុចចាប់ផ្តើម សម្រាប់សិទ្ធិទទួលបាន។

គំនិតដែលទីក្រុង Ottawa គួរតែចូលរួមជាមួយទីក្រុងប្រ៊ុចសែល ត្រូវតំណាងឲ្យភាពប្រាកដប្រជាតែពាក់កណ្តាលប៉ុណ្ណោះពីអ្នកអត្ថាធិប្បាយមួយចំនួន ខណៈដែលវិធានការដំឡើងពន្ធ និងការគំរាមកំហែងរបស់ប្រធានាធិបតីអាមេរិក លោក Trump ជំរុញឲ្យភាគីទាំង២ កាន់តែខិតជិតគ្នា។

នៅពេលដែលស្ថាប័នស្ទង់មតិ Abacus Data ដាក់សំណួរទៅកាន់ជនជាតិកាណាដា កាលពីចុងខែកុម្ភៈ ៤៤ភាគរយ បានឆ្លើយថា បាទ/ចាស ប្រទេសកាណាដាគួរតែចូលរួមជាមួយប្លុកដែលមានសមាជិក ២៧ប្រទេសនេះ។ ចំណែកសារព័ត៌មាន Politico រាយការណ៍ថា ច្រើនជាង ៤៦ភាគរយនៃអ្នកដែលត្រូវបានស្ទង់មតិ បានសម្តែងការគាំទ្រដោយទូទៅ សម្រាប់ការចូលរួមជាមួយប្លុកនេះ។

បើយោងតាមការស្ទង់មតិដែលបានចេញផ្សាយនៅសប្តាហ៍នេះ បានបង្ហាញថា មានតែ ៣៤ភាគរយនៃមនុស្សដែលត្រូវបានសាកសួរចំនួន ១.៥០០នាក់ប៉ុណ្ណោះ បានជំទាស់នឹងគំនិតនេះ ដោយអ្នកនៅសល់ផ្សេងទៀត មិនទាន់សម្រេចចិត្តថា យ៉ាងណា។

នៅក្នុងសន្និសីទសារព័ត៌មាន កាលពីថ្ងៃពុធ (ទី១២ ខែមីនា) អ្នកនាំពាក្យគណៈកម្មាធិការអឺរ៉ុប លោកស្រី Paula Pinho បាននិយាយពីលទ្ធផលនៃការស្ទង់មតិនេះថា៖ «វាមិនមែនជារឿងគួរឲ្យភ្ញាក់ផ្អើលនោះទេ ពីព្រោះសហភាពអឺរ៉ុប និងកាណាដា គឺជាដៃគូមានគំនិតដូចគ្នា ដែលចែករំលែកតម្លៃជាច្រើនជាមួយគ្នា និងក៏មានទំនាក់ទំនងជាប្រវត្តិសាស្ត្រដ៏រឹងមាំជាមួយគ្នាផងដែរ»៕