បារាំង៖ មនុស្សប្រមាណ ២០០នាក់បានប្រមូលផ្ដុំគ្នានៅក្នុងទីក្រុង Calais របស់បារាំងកាលពីយប់ថ្ងៃព្រហស្បតិ៍ ដើម្បីរំឭកដល់វិញ្ញាណក្ខន្ធជនអន្តោប្រវេសន៍យ៉ាងហោចណាស់ ២៧នាក់ដែលបានស្លាប់ក្នុងពេលព្យាយាមឆ្លងកាត់ផ្លូវទឹកអង់គ្លេស ចូលទៅក្នុងប្រទេសនេះ។ ហេតុការណ៍ក្រឡាប់លិចទូកកាលពីថ្ងៃពុធគឺជាសោកនាដកម្មដ៏ធំបផុត នៅក្នុងផ្លូវទឹកនៅសមុទ្រដ៏គ្រោះថ្នាក់ដែលបានខណ្ឌចែករវាងប្រទេសបារាំង និងចក្រភពអង់គ្លេស។
ការិយាល័យរដ្ឋអាជ្ញាធរបារាំងបានបើកការស៊ើបអង្កេតលើករណីលិចទូកនេះដោយនិយាយថា អ្នកស្លាប់ទាំងនោះរួមមានបុរសចំនួន ១៧នាក់, ស្ត្រី ៧នាក់ និងក្មេងប្រុស ២នាក់ និងក្មេងស្រីម្នាក់។ លោកនាយករដ្ឋមន្ត្រីអង់គ្លេស Boris Johnson បានអំពាវនាវឲ្យប្រទេសបារាំងយល់ព្រមនាំយកមនុស្ស ដែលបានឆ្លងកាត់ផ្លូវទឹកចូលទៅអង់គ្លេសត្រឡប់ទៅវិញ។ នាយករដ្ឋមន្ត្រីរូបនេះបានផ្ញើលិខិតទៅកាន់ប្រធានាធិបតីបារាំង Emmanuel Macron ដោយដាក់ចេញនូវវិធានការ ៥ដំណាក់កាលដើម្បីជំរុញ និងពន្លឿនឲ្យបានឆាប់ ដើម្បីចៀសវៀងសោកនាដកម្មដូចកាលពីថ្ងៃពុធទៀត ជាទីដែលជនអន្តោប្រវេសន៍ចំនួន ២៧នាក់បានស្លាប់។
ចំនួនជនអន្តោប្រវេសន៍ដែលចេះតែកើនឡើងឥតឈប់ឈរ ដោយសារតែការគេចចេញពីជម្លោះឬភាពក្រីក្រនៅអាហ្វហ្គានីស្ថាន ស៊ូដង់ អ៊ីរ៉ាក់ អេរីទ្រី ឬតំបន់ផ្សេងទៀតកំពុងប្រឈមគ្រោះថ្នាក់ខ្លាំង ក្នុងការឆ្លងសមុទ្រចេញពីប្រទេសបារាំងក្នុងក្ដីសង្ឃឹមថា នឹងទទួលបានសិទ្ធិជ្រកកោន ឬស្វែងរកឱកាសសាងអនាគតរុងរឿងនៅលើទឹកដីអង់គ្លេស។ យោងតាមការប៉ាន់ប្រមាណរបស់អង្គការសហប្រជាជាតិ សោកនាដកម្មកាលពីថ្ងៃពុធមិនមែនជាហេតុការណ៍ខុសប្រក្រតីទេនៅក្នុងសមុទ្រម៉េឌីទែរ៉ាណេ ជាទីដែលឆ្នាំនេះមានមនុស្សប្រមាណ ១,៦០០នាក់បានស្លាប់ ឬបាត់ខ្លួន៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
