ក្រុមគ្រួសាររបស់ពលរដ្ឋម៉ិកស៊ិកដែលបានបាត់ខ្លួនអស់រយៈពេលជាច្រើនឆ្នាំមកហើយនោះ កំពុងរង់ចាំចម្លើយពីការរកឃើញគំនរសម្លៀកបំពាក់ ស្បែកជើង និងគ្រោងឆ្អឹងមនុស្សនៅកសិដ្ឋានចិញ្ចឹមសត្វមួយកន្លែងស្ថិតនៅតំបន់ភាគខាងលិចម៉ិកស៊ិកដែលអាចក្លាយជាមូលដ្ឋាននៃការបូជាសព និងបញ្ចុះសព ។

ក្រុមសកម្មជនស៊ីវិលដែលស្វែងរកមនុស្សជាទីស្រលាញ់បាត់ខ្លួន បានរកឃើញផ្នូរដ៏ធំមួយកាលពីសប្តាហ៍មុននៅទីក្រុង Teuchitlan រដ្ឋ Jalisco ដោយមានឡ.ដែលអាចប្រើប្រាស់ដើម្បីបូជាសព ។

ការិយាល័យរដ្ឋអាជ្ញាម៉ិកស៊ិក ពុំបានឆ្លើយតបភ្លាមៗនោះទេចំពោះសំណើរបស់ទីភ្នាក់ងារព័ត៌មានរ៉យទ័រ សុំការធ្វើសេចក្តីអត្ថាធិប្បាយលើករណីមួយនេះ រយៈពេល ១ថ្ងៃប៉ុណ្ណោះ ក្រោយរដ្ឋអាជ្ញាជាន់ខ្ពស់លោក Alejandro Gertz សន្យាបើកការស៊ើបអង្កេតពេញលេញលើការរកឃើញផ្នូរសពដ៏ធំនេះ ហើយលោកនិយាយថា វាមិនអាចទៅរួចនោះទេកាលដែលក្រុមអាជ្ញាធររដ្ឋ Jalisco ពុំបានដឹងពីអ្វីកើតឡើងនោះ ។

ការិយាល័យរដ្ឋអាជ្ញារដ្ឋ Jalisco និយាយប្រាប់ទីភ្នាក់ងារព័ត៌មានរ៉យទ័រថា ពួកគេនឹងទទួលបានលទ្ធផលក្នុងរយៈពេល ២សប្តាហ៍លើការធ្វើតេស្តសម្លៀកបំពាក់ សំបកគ្រាប់កាំភ្លើង និងគ្រោងឆ្អឹងមនុស្ស ដែលត្រូវបានរកឃើញនៅទីក្រុង Teuchitlan ។

កាលពីថ្ងៃព្រហស្បតិ៍ម្សិលមិញ ក្រុមអាជ្ញាធរឹបអូសយកកសិដ្ឋានចិញ្ចឹមសត្វ Izaguirre ជាទីដែលពួកគេ និងសមាជិកក្រុម Guerreros Buscadores de Jalisco គឺជាក្រុមដែលបានរកឃើញកន្លែងមួយនេះកាលពីសប្តាហ៍មុន ត្រូវបានដាក់ពង្រាយ ដើម្បីបើកការស៊ើបអង្កេត ។

ស្ថិតនៅតំបន់ឆ្នេរប៉ាស៊ីហ្វិក រដ្ឋ Jalisco គឺជាទឹកដីរបស់ក្រុមមេខ្លោងជួញដូរគ្រឿងជំនាន់ថ្មី Jalisco ដែលជាអង្គការឧក្រិដ្ឋកម្មមួយត្រូវបានក្រុមអាជ្ញាធរចោទប្រកាន់ថា បានប្រើកម្លាំងបង្ខំ ដើម្បីជ្រើសរើសមនុស្សក្មេងៗ និងនៅពីក្រោយសេចក្តីរាយការណ៍មនុស្សបាត់ខ្លួនដ៏ច្រើនបំផុតនៅក្នុងរដ្ឋមួយនេះ ។

យោងតាមទិន្នន័យពីរដ្ឋាភិបាល បានឲ្យដឹងថា ប្រទេសម៉ិកស៊ិកមានមនុស្សជាង ១២៤.០០០នាក់ ដែលកំពុងបាត់ខ្លួន ៕