ប្រព័ន្ធផ្សព្វផ្សាយរដ្ឋកូរ៉េខាងជើង KCNA កាលពីថ្ងៃសៅរ៍ (ទី១៥ ខែមីនា) នេះ បានរាយការណ៍ថា អនុរដ្ឋមន្ត្រីការបរទេសរុស្ស៊ី លោក Andrei Rudenko កំពុងបំពេញទស្សនកិច្ច នៅកូរ៉េខាងជើង។

បើយោងតាមមន្ត្រីអ៊ុយក្រែន សហរដ្ឋអាមេរិក និងកូរ៉េខាងត្បូង បានឲ្យដឹងថា ទស្សនកិច្ចរបស់អនុរដ្ឋមន្ត្រីរូបនេះ ធ្វើឡើងបន្ទាប់ពីមាននូវសំណើរបស់សហរដ្ឋអាមេរិក សម្រាប់បទឈប់បាញ់ ក្នុងសង្គ្រាមអ៊ុយក្រែន ដែលកងទ័ពកូរ៉េខាងជើងរាប់ពាន់នាក់ ត្រូវបានដាក់ពង្រាយ ដើម្បីជួយដល់កងកម្លាំងរុស្ស៊ី។

លោក Rudenko បានចូលរួមក្នុងការអភិវឌ្ឍទំនាក់ទំនងរុស្ស៊ី ជាមួយកូរ៉េខាងជើង ចាប់តាំងពីទីក្រុងមូស្គូបានបើកការលុកលុយពេញលេញលើអ៊ុយក្រែន ក្នុងខែកុម្ភៈ ឆ្នាំ២០២២។ លោកក៏ជាសមាជិកនៃគណៈប្រតិភូរុស្ស៊ី នៅក្នុងដំណើរការចរចាសន្តិភាពជាមួយអ៊ុយក្រែន កាលពីពេលសង្រ្គាមចាប់ផ្ដើមដំបូងៗដែរ។

សារព័ត៌មាន KCNA បានរាយការណ៍ថា អនុរដ្ឋមន្ត្រីរូបនេះ បានទៅទស្សនាវិមានដ៏សំខាន់មួយ នៅក្នុងរដ្ឋធានីព្យុងយ៉ាង ប៉ុន្តែមិនបានផ្តល់ព័ត៌មានលម្អិតបន្ថែមនោះឡើយ៕

លោកស្រី Dorothy Shea ដែលពេលនោះជាឯកអគ្គរដ្ឋទូតរងសហរដ្ឋអាមេរិកប្រចាំនៅអង្គការសហប្រជាជាតិ បានប្រាប់ក្រុមប្រឹក្សាសន្តិសុខអង្គការសហប្រជាជាតិកាលពីខែមករាថា ទាហានកូរ៉េខាងជើងជាង ១២.០០០នាក់ បានស្ថិតនៅក្នុងប្រទេសរុស្ស៊ី ដោយបានប្រយុទ្ធជាមួយកងកម្លាំងអ៊ុយក្រែន នៅក្នុងតំបន់ព្រំដែន Kursk៕