ភ្នំពេញ៖ ហ្វេសប៊ុករបស់ក្រសួងធនធានទឹក និងឧតុនិយម បានឱ្យដឹងថា នៅថ្ងៃទី២៦ ខែវិច្ឆិកា ឆ្នាំ២០២១ ឯកឧត្ដម ម៉ៅ ហាក់ អនុប្រធានអាជ្ញាធរទន្លេសាប និងក្រុមការងារនាយកដ្ឋានជលសាស្ត្រ និងការងារទន្លេ បានចុះពិនិត្យសកម្មភាពការពារច្រាំងទន្លេមេគង្គជាបន្ទាន់។ ទីតាំងដែលមានច្រាំទន្លេបាក់នេះស្ថិតនៅភូមិពាម ឃុំរការកោង១ ស្រុកមុខកំពូល ខេត្តកណ្តាល ដោយរងការបាក់ច្រាំងប្រវែង ៣៥ម៉ែត្រ។

ករណីនេះ គឺច្រាំងបានបាក់ចូលដល់ផ្លូវលេខ 70A កាលពីយប់ថ្ងៃទី២២ ខែវិច្ឆិកា ឆ្នាំ២០២១ កន្លងមក នេះ។ ចាប់ថ្ងៃនោះមកដល់ពេលនេះ ក្រុមការងារក្រសួងធនធានទឹក និងឧតុនិយម បានប្រឹងប្រែងយ៉ាងសកម្មដើម្បីទប់ការពារច្រាំងទន្លេ ដោយបានចាក់ខ្សាច់បំពេញជើងទេរច្រាំង និងរៀបដាក់បាវខ្សាច់ Geotextile Bags ដើម្បីពង្រឹងច្រាំងទន្លេឡើងវិញ បានប្រមាណ ៣០ ភាគរយរួចហើយ។

ក្រសួងធនធានទឹក និងឧតុនិយម នឹងរៀបចំការពារច្រាំងទន្លេនៅតំបន់នោះដែលមានប្រវែង ៨០០ ម៉ែត្រឱ្យរឹងមាំ ដោយរៀបដាក់ប្រអប់ថ្ម(Gabion Boxes) នៅរដូវប្រាំងខាងមុខនេះផងដែរ៕​ ដោយ៖ គង់ ឌិន