ការស្ទង់មតិដែលធ្វើឡើងដោយសារព័ត៌មាន Asahi បានបង្ហាញនៅថ្ងៃចន្ទ (១៧ មីនា) នេះថា អត្រាគាំទ្រសាធារណៈចំពោះគណៈរដ្ឋមន្ត្រីរបស់លោកនាយករដ្ឋមន្ត្រីជប៉ុន Shigeru Ishiba បានធ្លាក់ចុះដល់កម្រិតទាបបំផុត បន្ទាប់ពីលោកបានប្រគល់ប័ណ្ណអំណោយដល់សមាជិកសភាគណបក្សកាន់អំណាចមួយចំនួន។

អត្រាគាំទ្រស្ថិតនៅក្នុងតួលេខ ២៦% ប៉ុណ្ណោះ ដោយបានធ្លាក់ចុះ ១៤% ពីការស្ទង់មតិពីមុនដែលបានធ្វើឡើងនៅក្នុងខែកុម្ភៈ ដែលនេះជាតួលេខអាក្រក់បំផុតចាប់តាំងពីលោក Ishiba ចូលកាន់តំណែងក្នុងខែតុលា ឆ្នាំមុន នេះបើយោងតាមការស្ទង់មតិថ្ងៃទី ១៥-១៦ ខែមីនា ដោយកាសែត Asahi ។

ការស្ទង់មតិផ្សេងទៀតដែលធ្វើឡើងដោយកាសែត Yomiuri និងកាសែត Mainichi កាលពីចុងសប្តាហ៍ ក៏បានបង្ហាញពីការទ្រសាធារណៈលើគណៈរដ្ឋមន្ត្រីរបស់លោក Ishiba ធ្លាក់ចុះដល់កម្រិតទាបបំផុតផងដែរ។

គួរឱ្យដឹងថា លោក Ishiba កំពុងស្ថិតក្នុងស្ថានភាពដ៏ក្តៅគគុកមួយ បន្ទាប់ពីលោកបានប្រគល់ប័ណ្ណអំណោយតម្លៃ ១០០.០០០យ៉េន (៦៧៣ ដុល្លារ) ម្នាក់មួយសន្លឹកដល់សមាជិកសភាជាន់ទាប ១៥នាក់ នៃបក្សប្រជាធិបតេយ្យសេរី (LDP) ដែលកំពុងកាន់អំណាចរបស់លោកនៅដើមខែនេះ ហើយបានទាក់ទាញការរិះគន់ថាអាចបំពានច្បាប់នយោបាយ។

លោក Ishiba បាននិយាយថា លោកបានប្រើ "ប្រាក់ហោប៉ៅផ្ទាល់ខ្លួន" ដើម្បីឱ្យអំណោយដល់សមាជិកសភាដើម្បីជា "ការលើកទឹកចិត្ត" សម្រាប់កិច្ចខិតខំប្រឹងប្រែងក្នុងការងាររបស់ពួកគេ៕