មេបញ្ជាការនៃអង្គភាពកងទ័ពរំដោះប្រជាជនចិន (PLA) ដែលមើលការខុសត្រូវលើច្រកសមុទ្រតៃវ៉ាន់ បានព្រមានថា យោធារបស់ប្រទេសចិន នៅតែមានការប្រុងប្រយ័ត្នខ្ពស់បំផុត និង "ត្រៀមខ្លួនរួចរាល់ជានិច្ចគ្រប់ពេលវេលា" ដើម្បីក្រសោបយកកោះតៃវ៉ាន់ និងរារាំងរាល់ការប៉ុនប៉ងទាមទារឯករាជ្យទាំងឡាយរបស់កោះនេះ។

ការព្រមានពីលោក Lin Xiangyang ដែលជាប្រធានបញ្ជាការភាគខាងកើតរបស់កងទ័ព PLA នេះ បានធ្វើឡើងនៅក្នុងសន្និសិទមួយក្នុងទីក្រុងប៉េកាំង កាលពីថ្ងៃសុក្រសប្ដាហ៍មុន ដើម្បីប្រារព្ធខួបលើកទី២០ នៃច្បាប់ប្រឆាំងអបគមន៍ ឬការបះបោរផ្ដាច់ខ្លួន ហើយក៏កើតឡើងបន្ទាប់ពីបណ្ដាប្រមុខមន្រ្តីចិន ប្ដេជ្ញាពន្លឿនការបង្រួបបង្រួម។

ទីក្រុងប៉េកាំងមើលឃើញថា តំបន់តៃវ៉ាន់ ដែលជាផ្នែកមួយនៃប្រទេសចិន នឹងត្រូវបានបង្រួបបង្រួមឡើងវិញដោយប្រើប្រាស់កម្លាំងប្រសិនបើចាំបាច់ ហើយច្បាប់ប្រឆាំងអបគមន៍នេះ បានបម្រើជាមូលដ្ឋានច្បាប់សម្រាប់ការទប់ស្កាត់នឹងឯករាជ្យភាពរបស់តៃវ៉ាន់ និងលើកកម្ពស់ការបង្រួបបង្រួមឡើងវិញ។

គួរឱ្យដឹងថា ច្បាប់ប្រឆាំងអបគមន៍របស់ចិន ត្រូវបានអនុម័តក្នុងឆ្នាំ២០០៥ ដើម្បី "ប្រឆាំង និងត្រួតពិនិត្យការផ្តាច់ខ្លួនរបស់តំបន់តៃវ៉ាន់" និង "ជំរុញការបង្រួបបង្រួមជាតិដោយសន្តិវិធី" ប៉ុន្តែច្បាប់នេះក៏ អនុញ្ញាតឱ្យប្រើ "មធ្យោបាយមិនសន្តិភាព" ផងដែរក្រោមលក្ខខណ្ឌការពារអធិបតេយ្យភាពរបស់ខ្លួន៕