ប្រទេសអ៊ីរ៉ង់ កាលពីថ្ងៃអាទិត្យ (ទី១៦ ខែមីនា) ជាថ្មីម្តងទៀតបានបដិសេធមិនបានផ្តល់ជំនួយដល់ក្រុមឧទ្ទាមហ៊ួទីរបស់ប្រទេសយេម៉ែននោះឡើយ បន្ទាប់ពីសហរដ្ឋអាមេរិកបានបើកការវាយប្រហារតាមអាកាសលើក្រុមនេះ ហើយប្រធានាធិបតី លោក Donald Trump បានព្រមានថា ទីក្រុងតេអេរ៉រង់ នឹងទទួលខុសត្រូវទាំងស្រុង ចំពោះសកម្មភាពរបស់ខ្លួន។

ក្រសួងសុខាភិបាលដែលគ្រប់គ្រងដោយក្រុមហ៊ួទី បានឲ្យដឹងថា ការវាយប្រហាររបស់អាមេរិក បានសម្លាប់មនុស្សយ៉ាងហោចណាស់ ៣១នាក់ ក្នុងនោះរួមមានទាំងស្ត្រី និងកុមារផងដែរ ហើយជាង ១០០នាក់ បានរងរបួស។ ហើយក្រុមឧទ្ទាមនេះបានបន្ថែមថា ការវាយប្រហារមួយ បានត្រូវចំផ្ទះ ២ខ្នង នៅភាគខាងជើងខេត្ត Saada ដោយបានសម្លាប់កុមារ ៤នាក់ និងស្ត្រីម្នាក់។ 

ក្រុមហ៊ួទីបានកំណត់គោលដៅម្តងហើយម្តងទៀត លើការដឹកជញ្ជូនអន្តរជាតិ នៅសមុទ្រក្រហម ហើយបានបាញ់មីស៊ីល និងយានដ្រូនទៅដែនដីអ៊ីស្រាអែល ជាអ្វីដែលក្រុមឧទ្ទាមមួយនេះ បានប្រាប់ថា ជាការបង្ហាញសាមគ្គីភាពជាមួយប៉ាឡេស្ទីន នៅតំបន់ហ្កាហ្សាស្ទ្រីប ជាកន្លែងដែលអ៊ីស្រាអែលបានធ្វើសង្រ្គាមជាមួយក្រុមហាម៉ាស ជាសម្ព័ន្ធមិត្តរបស់អ៊ីរ៉ង់មួយផ្សេងទៀត។ សហរដ្ឋអាមេរិក និងប្រទេសផ្សេងទៀត បានចោទប្រកាន់អ៊ីរ៉ង់ជាយូរមកហើយថា បានផ្តល់ជំនួយយោធាដល់ក្រុមហ៊ួទី ហើយកងទ័ពជើងទឹកអាមេរិក បានរឹបអូសយកគ្រឿងបន្លាស់មីស៊ីលផលិតដោយអ៊ីរ៉ង់ និងសព្វាវុធផ្សេងទៀតដែលខ្លួនបាននិយាយថា ត្រូវបានរៀបចំបញ្ជូនទៅឲ្យក្រុមសកម្មប្រយុទ្ធដែលគ្រប់គ្រងរដ្ឋធានីសាណារបស់យេម៉ែន និងភាគខាងជើងរបស់ប្រទេសនេះ។

តែបើយោងទូរទស្សន៍រដ្ឋ បានឲ្យដឹងថា លោកឧត្តមសេនីយ៍ Hossein Salami ដែលជាប្រមុខឆ្មាំបដិវត្តន៍ប៉ារ៉ាយោធារបស់អ៊ីរ៉ង់ បានបដិសេធថា ប្រទេសរបស់លោក មិនបានជាប់ពាក់ព័ន្ធក្នុងការវាយប្រហាររបស់ក្រុមហ៊ួទីនោះឡើយ ដោយនិយាយថា ខ្លួន «មិនបានដើរតួនាទីក្នុងការកំណត់គោលនយោបាយជាតិ ឬប្រតិបត្តិការ» របស់ក្រុមសកម្មប្រយុទ្ធដែលខ្លួនមានសម្ព័ន្ធមិត្តនៅទូទាំងតំបន់នោះទេ។

លោក Trump កាលពីថ្ងៃសៅរ៍ចុងសប្ដាហ៍កន្លងមក បានប្តេជ្ញាថា នឹងប្រើប្រាស់ «វិធានការយោធាយ៉ាងខ្លាំងក្លា» រហូតដល់អាចបញ្ឈប់ក្រុមហ៊ួទីមិនឲ្យវាយប្រហារលើការដឹកជញ្ជូន តាមច្រករបៀងដែនសមុទ្រដ៏សំខាន់៕